Халыма өрүскэ гидрологтар сабаҕалааһыннарынан, өрүс мууһа Зырянка бөһүөлэгин таһынан ыам ыйын 20–21 күннэригэр, оттон Орто Халыма куоратын таһынан — ыам ыйын 23–25 күннэригэр эстэрэ күүтүллэр.
Зырянка таһыгар биир суукка иһигэр уу таһыма 60 сантиметр үрдээтэ, кэлэр сууккаҕа муус хамсыыра күүтүллэр. Бу туһунан брифинг кэмигэр Саха сирин Бырабыытылыстыбатын бэрэссэдээтэлин бастакы солбуйааччы Дмитрий Садовников иһитиннэрдэ.
Уопсайын өрөспүүбүлүкэ үрдүнэн Өлүөнэ, Алдан уонна Бүлүү өрүстэргэ муус барыытын кэмэ салҕанар. Өлүөнэҕэ муус барыыта Хаҥалас, Мэҥэ Хаҥалас, «Дьокуускай куорат» уокурук, Нам уонна Кэбээйи улуустарын сирдэринэн-уоттарынан ааһар.
Муус барыытын алларааҥҥы уһуга Кэбээйи улууһун Сангаар бөһүөлэгин таһыгар баар. Уу таһыма 923 сантиметрга тиийдэ, манна кутталлаах таһым 1315 сантиметр буолар. Үөһээҥҥи уһуга «Дьокуускай куорат» уокуругун Табаҕатааҕы гидропоһун таһыгар баар. Уу таһыма 852 сантиметр, манна кутталлаах таһым 970 сантиметрга тэҥнэһэр.
Кэлэр сууккаҕа сааскы халаан уутун саамай үрдүкү таһыма ааһара күүтүллэр, уу эбии 10–30 сантиметр үрдүөҕэ.
Нам улууһун нэһилиэктэригэр балаһыанньа:
- Бөтүҥ (Бүтэй Үрдэ) нэһилиэгэр уу таһыма 964 сантиметр, өрүс сүрүн сүнньэ көстүбэт. Кутталлаах таһым — 1000 сантиметр.
- Тумул нэһилиэгин таһыгар уу таһыма 977 сантиметр, сүрүн сүнньэ көстүбэт. Кутталлаах таһым эмиэ 1000 сантиметр буолар.
- Хатырык нэһилиэгин таһыгар уу таһыма 963 сантиметрга тиийдэ, кутталлаах таһым — 1000 сантиметр.
«Халаан уутугар үлэлиир бары сулууспалар үрдүкү бэлэмнээх балаһыанньаҕа үлэлииллэр. Олохтоох бэйэни салайыныы уорганнарын кытта бииргэ, сүрүннэммит үлэ ыытыллар», — диэн бэлиэтээтэ Дмитрий Садовников.
Сиһилии: https://www.sakha.gov.ru/news/49161