Бүгүн Дьокуускайга «Сайдыы» комплексы үөрүүлээх быһыыга-майгыга астылар.
Манна элбэх киһи кыбартыыраны чэпчэтиилээх бырагырааманан атыыласпыт. Үөрүүлээх тэрээһиҥҥэ СӨ Бырабыыталыстыбатын Бэрэссэдээтэлин Бастакы солбуйааччы Дмитрий Садовников кыттыыны ылла.
Мустубут ыалдьыттарга туһаайан тыл этэригэр Дмитрий Садовников бу Ньукуолун күнүн кэнниттэн тута буолбут үөрүүлээх түгэн ураты суолталааҕын бэлиэтээтэ.
—Бүгүн ураты бэлиэ күн — «Сайдыы» дьон олорор саҥа комплексын үөрүүлээх аһыллыыта. Итиэннэ бу ыам ыйын 22 күнүн кэнниттэн тута, Саха сирэ бүттүүнэ Ньукуолуну көрсүбүтүн кэнниттэн буолара эмиэ ураты бэлиэнэн буолар. Тоҕо диэтэххэ, саха норуотугар Ньукуолун биир саамай күүтүүлээх күн. Күөххэ үктэнэрбитин уһун, тыйыс кыһын устата кэтэһэрбит үөрүүлээх. Бу күн биһиги айылҕаттан үтүөнү, хас биирдии дьиэҕэ-уокка баайы-дуолу, или-эйэни көрдөһөбүт. Онон бүгүн саҥа, аныгы олорор дьиэ комплексын аанын арыйыы, бу баҕа санаалар туолалларын кэрэһилиир. «Сайдыы» — аата да этэрин курдук, үүнүү, сайдыы диэн өйдөбүллээх. Манна хас биирдии кыбартыыраҕа иллээх-эйэлээх, дьоллоох олох баар буоллун, тиэргэн оҕо күлүүтүнэн туоллун, — диэтэ Дмитрий Садовников.
Кини төһө да уустук экэнэмиичэскэй балаһыанньа баарын иһин, өрөспүүбүлүкэ дьиэ-уот тутуутун тэтимин тутуһарын тоһоҕолоон бэлиэтээтэ.
«Сайдыы» 16 мэндиэмэннээх, 392 кыбартыыралаах. Мантан 348 — биирдии хостоохтор, 44 — иккилии. Уопсай олорор сирин иэнэ 17 121 кв.м. Доруобуйаларыгар хааччахтаах дьоҥҥо табыгастаах усулуобуйа тэриллибит. Тиэргэнигэр оҕо оонньуур уонна успуордунан дьарыктанар былаһааккалардаах.
Тэрээһиҥҥэ вице-премьер «Эволюция» ХЭУо кылаабынай инженеригэр Прокопий Павловка, «ТД-Групп» ХЭУо дириэктэригэр Гаврил Полускиҥҥа, «ТД-Групп» ХЭУо учаастагын начаалынньыгар Михаил Поповка махтал суруктары туттарда. «Эволюция» хампаанньа «Комфорт» кылаастаах олорор дьиэлэри тутар. Билигин бу хампаанньа Дьокуускайга А.И.Софронов аатынан уулуссаҕа биир дьиэни тута сылдьар. Тутуу 2028 сылга түмүктэниэхтээх.
Сиһилии: https://www.sakha.gov.ru/news/49744
СӨ Ил Дарханын уонна Бырабыыталыстыбатын пресс-сулууспата