Саха сирин киин улуустарыгар көмүөл мууһа ааста. Нам улууһугар Быыһыыр сулууспа уонна Хабаровскайтан Арассыыйа ЫБММ 20 быыһааччыта дьуһуурунайдаабыт гидропостарын уһуллулар.
Өлүөнэ өрүскэ муус харыыта Нам улууһун олохтоохторугар үгүстүк улахан тургутуунан буолааччы.
— Халаан уута улахан хоромньуну аҕалбыт 2024 сылын биһиги бары өйдүүбүт. Ночооту ааҕыы билигин да салҕанар, 2024 сыллааҕы алдьатыылаах халаан кэнниттэн дьон барыта өссө даҕаны оннугар түһэ, уоскуйа иликтэр, — диэн улуус дьаһалтатын бэрэстэбиитэллэрэ эттилэр. — Онтон бу долгутуулаах кэмҥэ көмөҕө кэлэргэ бэлэм быыһааччылар анал тиэхиньикэлээх аттыбытыгар дьуһуурунайдыы сылдьаллара дьоҥҥо быдан уоскулаҥы биэрэр.
Нам улууһун уонна уу ылар кутталлаах зонаҕа киирэр нэһилиэктэр дьаһалталара СӨ Гражданскай оборуона уонна нэһилиэнньэ олоҕун-дьаһаҕын куттала суох буолуутугар министиэристибэтин, Саха сиринээҕи Быыһыыр сулууспатын, ЫБММ салайааччыларыгар уонна быыһааччыларга Махтал суруктары туттардылар:
— Айылҕа алдьархайа биһиги күүспүтүн-тулуурбутун тургутар күннэригэр эһиги көмөҕүт биһиэхэ бигэ өйөбүл буолла. Көмө көрдүүр ыксаллаах иһитиннэриилэр оннуларыгар үгүстүк махтал тылларын истэргитигэр баҕарабыт!