Бүгүн Оһуокай күнүн чэрчитинэн Былатыан Ойуунускай аатынан Саха академическай тыйаатырыгар култуура үлэһиттэрэ, уопсастыбаннай түмсүүлэр бэрэстэбиитэллэрэ уопсастыбаннас мунньаҕын тэрийэн ыыттылар.
Тэрээһиҥҥэ СӨ Бырабыыталыстыбатын бэрэссэдээтэлин солбуйааччы Сергей Местников кыттыыны ылла. Мунньахха оһуокай түмсүү уонна сомоҕолоһуу бэлиэтэ буоларын тоһоҕолоон бэлиэтээтилэр.
Сергей Местников омук үгэстэрин харыстааһын, ыччакка иҥэрии уонна оһуокайы сайыннарыы хайысхаларын туһунан санаатын үллэһиннэ.
— Быйыл үһүс сылын ыытыллар Ил Дархан Айсен Николаев Оһуокай күнүн бэлиэтииргэ анаан таһаарбыт ыйааҕа – стратегическай суолталаах. Бу күн араас тэрээһин ыытыллар. Ол курдук, сайдыыга тирэх буолар Оҕо оһуокайын күрэҕэр 26 улуустан кэлэн кыттыыны ылбыттара. Ыччат оһуокайа эмиэ тэтимнээхтик сайдар. Саамай үөрүүлээҕэ, оһуокайга оҕо уонна ыччат уһуйуллан эрэр. Үөрэх сылын түмүктүүр линиэйкэлэр, өрөспүүбүлүкэ 630 оскуолата Тиһэх чуораанын оһуокайынан түмүктүүллэрэ үгэскэ кубулуйда. Бу үүнэр эрэр көлүөнэ норуот төрүт үгэһин салгыы сайыннаран – кэрэхсэбиллээх. Онон Оһуокай күнүн инникитин да киэҥник бэлиэтиир, дьону-сэргэни түмэр, омукпут уратытын кэлэр көлүөнэҕэ тиэрдэр туһугар бииргэ үлэлэһэргэ бэлэммит, — диэн бэлиэтээтэ СӨ Бырабыыталыстыбатын бэрэссэдээтэлин солбуйааччы Сергей Местников.
Мунньах кыттыылаахтара оһуокайы саха омугун духуобунай баайын, култууратын, өбүгэлэрбит үгэстэрин илдьэ сылдьар сүдү күүс быһыытынан билинэн, салгыы сайыннаран, тарҕатыыга туһуламмыт бырайыактары өйөөһүн уонна култуура тэрилтэлэрин кытта ситимнээх үлэни күүһүрдэр туһунан быһаарыы ыллылар.
Бу күн Саха тыйаатырын аттыгар киин куорат уопсастыбыннаһа, ыччат түмсүүлэрэ оһуохвй түһүлгэтин төрүттээн, мустубут дьон илии-илиилэриттэн ылсан, өбүгэ үҥкүүтүн оһуорун оҥордулар.
Үөрүүлээх тэрээһиҥҥэ СӨ Бырабыыталыстыбатын бэрэссэдээтэлин солбуйааччы Сергей Местников ыччат оһуокайын этээччилэрин кыайыылахтарыгар харчынан бириэмийэни туттарда. Сергей Васильевич бу күннэргэ ыччаттарга анаан ыытыллыбыт 2-с өрөспүүбүлүкэтээҕи оһуокай “Куйаар далай түһүлгэ” күрэһин 1-кы истиэпэннээх кыайыылааҕынан тахсыбыт, Таатта улууһун ыччата Иван Иванов СӨ Бырабыыталыстыбатын 120 тыһыынча солкуобай суумалаах харчынан бириэмийэ сэртипикээтинэн бэлиэтэннэ.
Эмиэ бу күрэх “Саҥа саҕалааччылар” түһүмэҕэр 1-кы истиэпэннээх кыайыылааҕынан буолбут Сунтаар улууһун Кэрэ Куота Карина Петрова 85 тыһыынча солкуобай суумалаах харчынан бириэмийэ сэртипикээтин тутта. Бу үөрүүлээх түгэн кэнниттэн “Добун оһуокай” буолла.
Оһуокай күнүн тэрээһиннэрэ саха норуотун култууратын үйэтитиигэ, ыччаты иитиигэ уонна саха норуотун сомоҕолоһуутугар сүҥкэн суолталаахтарын өссө төгүл көрдөрдүлэр.