Ыам ыйын ортотугар сааскы сөҥүү, муус барыыта уонна хайа хаара ууллуута сыл аайы “Өймөкөөн” өрөспүүбүлүкэтээҕи айан суолун алдьатан, улуус нэһилиэктэрин олохтоохторугар улахан уустуктары үөскэтэр.
Бу күннэргэ «Наледнай» («Тарыҥнаах»), «Горбатай» (Агаякан күргэтин иннигэр) уо.д.а. учаастактарынан хаар ууллан, муус ирэн айан суолун алдьатта. Бу туһунан видеолары уонна хаартыскалары улуус олохтоохторо “Северная заря” хаһыакка ыыталлар.
«Сордоҥноох сэлиэнньэтин олохтоохторо үһүс күннэрин сибээһэ уонна интэриниэтэ суох олороллор, онно эмиэ суолу уу суурайбыт», — диэн Томтор олохтоохторо кэпсииллэр. Суол хаһаайыстыбатын управлениета иһитиннэрбитинэн, “Өймөкөөн” өрөспүүбүлүкэтээҕи айан суолун «Наледнай» («Тарыҥнаах») учаастагар «Саха суоллара» (“Дороги Саха”) ХЭУо тэрилтэ үлэлиир буолан, быстах кэмҥэ сылдьар суол оҥоһуллубут. Айан суолун учаастагын чөлүгэр түһэрии уу түстэҕинэ эрэ ыытыллыан сөп”, диэн суруйар улуустааҕы “Северная заря” хаһыат телеграм-ханаала.
Томтор нэһилиэгин баһылыга Алексей Винокуровы кытта бүгүҥҥү күҥҥэ балаһыанньа хайдаҕын билсэ сырыттым.
— Томтор туһаайыытынан “Наледнай” («Тарыҥнаах») уонна “Тирэх” муоста учаастактарынан суолу уу улаханнык сууйбут. Ол эрээри массыыналар тохтообокко сылдьаллар. Суолу оҥорор бэдэрээтчиттэр туората сылдьаллар.
Бүгүн “Бүлүү” федеральнай суол управлениетын салалтатын кытта кэпсэтэ сырыттым. Кэлэр нэдиэлэ саҥатыгар тахсыбыт хоромньуну ааҕа-суоттуу, балаһыанньаны миэстэтигэр билсэ управление эппиэттээх үлэһитэ Геннадий Сивцев кэлиэҕэ. Билигин халлаан туруга үчүгэй, онон кэлэр нэдиэлэҕэ диэри уу түһүөҕэ, суолу бэдэрээтчиттэр өрөмүөннүөхтэрэ, — диэн быһаарда Алексей Винокуров.