Петербурга норуоттар икки ардыларынааҕы экэнэмиичэскэй пуорумҥа Саха Өрөспүүбүлүкэтин уонна ЛНӨ Бырабыыталыстыбаларын икки ардыларыгар эргиэн-экэнэмиичэскэй, научнай-тэхиньиичэскэй, социальнай, култуурунай уо.д.а. бииргэ үлэлээһиҥҥэ сөбүлэҥи олоххо киллэрэр тэрээһиннэр Былааннарыгар илии баттанна.
Докумуоҥҥа Ил Дархан Айсен Николаев уонна ЛНӨ баһылыга Леонид Пасечник илии баттаатылар.
— Бүгүн илии баттаабыт сөбүлэһиибитин олоххо киллэрэр дьаһаллар былааннара социальнай-экэнэмиичэскэй сайдыы салаатыгар өрөспүүбүлүкэлэрбит икки ардыларыгар сыһыаны сайыннарыыга олус суолталаахтар. Экэниэмикэҕэ, социальнай эйгэҕэ, култуура эйгэтигэр сибээстэрбитин сайыннарыахпыт. Бырамыысыланнаска элбэҕи оҥоруохтара, ИТ-технологиялары сайыннарарга, — диэтэ Айсен Николаев докумуоҥҥа илии баттаммытын кэнниттэн.
—Атыы-эргиэн эйгэтигэр, хочуолунайдары уонна шахтаҕа туттуллар тэриллэри тиэрдии эйгэтигэр бииргэ үлэлиэхпит. Бырамыысыланнаска, тыа хаһаайыстыбатын бородууксуйатын астааһыҥҥа, туризмҥа, социальнай көмүскэлгэ, ону тэҥэ ИТ-кииннэри тэрийиигэ мэтэдиичэскэй көмөҕө кыахтар ырытылыннылар. Эрэгийиэннэр икки ардыларынааҕы уонна норуоттар икки ардыларынааҕы пуорумнарга, ыччат тэрээһиннэригэр бииргэ кыттарга бэлэммит. Биһиги эрэгийиэннэрбит икки ардыларыгар уопут атастаһыытыгар улахан болҕомтону уурабыт. Онуоха икки субъект бары кэриэтэ биэдэмистибэлэрэ кытталлар. Ити өрөспүүбүлүкэлэр икки ардыларыгар сибээһи бөҕөргөтүөҕэ диэн эрэнэбин. Оттон бу үлэҕэ сүрүнэ — эрэгийиэннэри сайыннарарга, олохтоохторго аныгылыы, табыгастаах, тупсаҕай буоларын курдук оҥорорго бэйэ-бэйэҕэ көмөлөһүү буолар, — диэн Леонид Пасечник бэлиэтиир.
Сиһилии: https://www.sakha.gov.ru/news/52025
СӨ Ил Дарханын уонна Бырабыыталыстыбатын пресс-сулууспата
Хаартыскаҕа Андрей Сорокин түһэриитэ, ЯСИА