Саха сирин баһылыга Айсен Николаев Арассыыйа Наукаларын академиятын (РАН) академиктарын кытта оробуочай көрсүһүүтүн ыытта. Кэпсэтии Арктика зонатыгар фундаментальнай уонна прикладной наука сайдыытын сүрүн хайысхаларыгар ананан, Саха сирин научнай кыаҕын күүһүрдүүгэ уонна дойду технологическай суверенитетын бөҕөргөтүүгэ туһуланна.
«Саха Өрөспүүбүлүкэтин, РФ саамай бөдөҥ субъегын, саамай улахан Арктикатааҕы сирин-уотун сайдыыта, научнай арыаллааһына суох сатаммат. Сүрүнэ — Саха сирин нэһилиэнньэтэ аҕыйаабат, үксээн иһэр, олох уһуна уһуур. Биһиги инники сайдарбытыгар саҥа технологиялары көхтөөхтүк киллэриэхтээхпит. Наукалар Академияларын кытта бииргэ үлэлээһин саамай киэҥ далааһыннаах соруктары быһаарарга көмөлөһүөҕэр эрэллээхпин», — диэтэ Айсен Николаев.
Ил Дархан эппитинэн, 2021 сылтан өрөспүүбүлүкэ Наукаларын академията Арассыыйа Наукаларын академиятын, Сибиирдээҕи салаатын уонна РАН Дьокуускайдааҕы научнай киинин кытта бииргэ үлэни тэрийэр бастыҥ научнай тэрилтэнэн быһаарыллыбыта. Бу сибээс «Хоту» научнай-үөрэтэр киин, комплекснай эспэдииссийэлэр уонна бииргэ оҥорор бырайыактар нөҥүө туһалааҕын көрдөрдө.
РАН академига, РАН вице-бэрэсидьиэнэ Николай Макаров бэлиэтээбитинэн, Арассыыйа Наукаларын академията 6 тыһыынча научнай бырайыакка научнай-методическай үөрэтиини оҥорор, олор истэригэр Арктиканы үөрэтиигэ, хотугу сирдэр сайдыыларыгар, ордук туруктаах уонна табыгастаах олоҕу тэрийиигэ туттуллуон сөптөөх технологическай быһаарыылары көрдөөһүҥҥэ сыһыаннаах элбэх бырайыак баар.
«Дьокуускайга маннык күүстээх учуонайдар хамаандалара, баҕар, аан бастаан мустубут буолуо. Биһиэхэ Наукалар Академияларын бэрэстэбиитэллэрэ, дойду илин өттүгэр баар үс эрэгийиэннээҕи салаалар салайааччылара, институттар дириэктэрдэрэ бааллар. Сүрүн сорукпут – тугу бииргэ оҥоруохпутун, тугунан туһалыахпытын сөбүн дьүүллэһии, дьиҥнээх дьыалаҕа туһуланыы», — диэтэ РАН вице-бэрэсидьиэнэ.
Көрсүһүүгэ Самойловскай арыыга ыстаансыйаны сайыннарыыга уонна үһүс комплекснай научнай эспэдииссийэни ыытыыга улахан болҕомто уурулунна. Научнай-үөрэхтээһин тэрилтэлэрин консорциумун тэрийии кыаллара көрүлүннэ.
РАН академига, РАН вице-бэрэсидьиэнэ, РАН Сибиирдээҕи салаатын бэрэссэдээтэлэ Валентин Пармон бэлиэтээбитинэн, Самойловскай арыыга аныгылыы тииптээх олохтоох ыстаансыйа баар буолуута наука сайдыытыгар уонна каадырдары быһаччы өрөспүүбүлүкэ иһигэр бэлэмнээһиҥҥэ саҥа тыыны биэриэҕэ.
Бэс ыйын 19-21 күннэригэр Дьокуускайга Арассыыйа Наукаларын академиятын президиумун уонна Өрөспүүбүлүкэ бырабыыталыстыбатын «Арктика – стратегическай уонна инновационнай быһаарыылара: түмүктэр, саҥа ыҥырыылар уонна кэскиллэр» диэн тиэмэлээх холбоһуктаах кэҥэтиллибит мунньаҕа ыытыллар.