Саха сиригэр биллэриллибит Култуура сылынан, биллиилээх муосчут, ювелир, Саха сирин норуодунай худуоһунньуга уонна Арассыыйа үтүөлээх худуоһунньуга Георгий Николаевич Родионов дьиэ кэргэнэ чулуу маастар 72 үлэтиттэн турар кэлиэксийэни өрөспүүбүлүкэ Национальнай уус-уран түмэлигэр биэрдэ.
«Худуоһунньук дьиэ кэргэнэ, кыыһа Варвара Георгиевна Куличкина аҕаларын баай нэһилиэстибэтэ биирдиилээн дьон кэлиэксийэлэринэн ыһыллан, ханна эрэ сүтэн-оһон хаалыахтарын баҕарбатахтар. Онон бу биир кэлим, баай нэһилиэстибэни норуот илиитигэр, түмэлгэ туттараллар», – диэн түмэл кылаабынай научнай үлэһитэ Ася Габышева бэлиэтээтэ.
Худуоһунньук, педагог уонна чинчийээччи Георгий Николаевич бэйэтин олоҕун Саха сирин төрүт уус-уран култууратын харыстааһыҥҥа уонна сайыннарыыга анаабыта. Кини сэлии муоһуттан сүүһүнэн үлэни — объемнай пластиканы, рельефтэри, чорооннору, куубагы, саахыматтары, быһахтары, табахтыыр трубкалары уонна да атыттары оҥорбута. Кини үлэлэрэ өрөспүүбүлүкэ, Бүтүн Арассыыйа уонна норуоттар икки ардыларынааҕы быыстапкаларга туруоруллубуттара.
Ася Габышева Георгий Родионов айар үлэтин уратытыгар болҕомтону уурда: маастар сэлии муоһун кытта үлэлииригэр, матырыйаалы аһара нарын, ажурнай кыһыынан чэпчэтэ сатаабат эбит. Төттөрүтүн, худуоһунньук муос айылҕаттан бэриллибит быһыытын оннунан хаалларан, композицияны баар муос кээмэйигэр олоҕуран оҥороро. «Сэлии муоһун ылла да, ханна туох буолуохтааҕын тута көрөрө. Микеланджело курдук, наадата суоҕун эрэ кыһан ылара, оччоҕо маннык дьикти фигуралар тахсаллара», — диэн кылаабынай научнай үлэһит үллэһиннэ.
Бэриллибит үлэлэр өрөспүүбүлүкэ түмэлин пуондатын байытыахтара. Түмэл генеральнай дириэктэрэ Влада Тимофеева этэринэн, маастар 72 үлэтэ бииргэ ураты монографическай кэлиэксийэни тэрийэллэр.
«Биһиги чулуу муосчут айар үлэтин уларыйыытын-сайдыытын толору көрдөрөр биир кэлим монографическай кэлиэксийэни тутабыт. Ураты сыаннастаах сэлии муоһуттан оҥоһуллубут үлэлэр буолаллара өссө суолталаах», – диэтэ дириэктэр.
Санатан эттэххэ, Георгий Родионов (1945-2026) 1945 сыллаахха сэтинньи 12 күнүгэр Чурапчы улууһун Хоптоҕо нэһилиэгэр төрөөбүтэ. 1968 сыллаахха Дьокуускайдааҕы уус-уран училищены, 1993 сыллаахха Дьокуускайдааҕы судаарыстыбаннай университет педагогическай факультетын бүтэрбитэ. Оскуолаларга, култуура дьиэлэригэр үлэлээбитэ, уус-уран училищеҕа үөрэппитэ, Дьокуускайдааҕы ювелирнай собуот уонна норуоттар икки ардыларынааҕы Сэлии түмэлин кылаабынай худуоһунньугунан сылдьыбыта. Араас сылларга Дьокуускайдааҕы судаарыстыбаннай инженернэй-тэхинничэскэй институт култуураҕа уонна ускуустубаҕа кафедратын доцена, М.К. Аммосов аатынан Хотугулуу-Илиҥҥи федеральнай университет архитектураҕа уонна куораты тутууга кафедратын доцена буола сылдьыбыта.
Саха сирин Ил Дархана Айсен Николаев Ил Түмэҥҥэ Анал этиитигэр култуурунай-историческай нэһилиэстибэни харыстааһыны өрөспүүбүлүкэҕэ Култуура сылын биир сүрүн соругунан бэлиэтээбитин санатабыт.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.
