Дьокуускай куорат суутун бириистэптэрин салаатын үлэһиттэрэ суут уурааҕын толорон, дьиэ хаһаайкатын быраабын чөлүгэр түһэрдилэр. Ыытыллыбыт дьаһаллар түмүктэринэн, бииргэ олорон мунньуммут баайы-дуолу үллэстиигэ дьахтарга тиксибит кыбартыыраттан кини урукку кэргэнэ таһаарылынна.
Дьахтар дьиэни соҕотоҕун бас билэр бырааптааҕын үрдүнэн, урукку кэргэнэ онно салгыы олорбут уонна пропискаламмыт эбит. Ити курдук эр киһи дьиэ хаһаайкатын сокуоннай интэриэһин кэспит. Быраабын көмүскүүр инниттэн дьахтар суукка сайабылыанньа биэрэн, урукку кэргэнэ дьиэни туһанар бырааба быстыбытынан билинэргэ уонна кинини кыбартыыраттан таһаарарга ирдээбит.
Суут докумуонугар олоҕуран, суут бириистэптэрэ дьыаланы тэрийэн, ирдэнэр дьаһаллары барытын оҥорбуттар. Суут уурааҕын толоруу чэрчитинэн, дьахтар бэйэтин баайын-дуолун толору бас билэр уонна дьаһайар бырааба чөлүгэр түһэрилиннэ. РФ Суут бириистэптэрин федеральнай сулууспатын Саха сиринээҕи управлениета гражданнар баайга-дуолга бырааптарын көмүскүүр үлэтин салгыыр.