“Литературная газета” сурунаал национальнай өрөспүүбүлүкэлэр суруйааччыларын, бэйиэттэрин, айар куттаах дьонун айымньыларын тиһигин быспакка бэчээттиир.
“Многоязыкая лира России” анал рубрика национальнай өрөспүүбүлүкэлэр ааптардарын айар үлэлэрин билиһиннэрэргэ уонна өйүүргэ ананар. Ону таһынан национальнай өрөспүүбүлүкэлэргэ литэрэтиирэ сайдыытын туһунан дьүүллэһэр ыстатыйалары бэчээттиир.
Литэрэтиирэ, култуура, киинэ, тыйаатыр, бэлиитикэ, уопсастыба эйгэлэрин киэҥник хабан суруйар хаһыакка кэнники кэмнэргэ Саха сириттэн элбэх айар киһи айымньыта бэчээттэнэн, биһирэбили ылар.
Ол курдук хаһыат ааҕааччылара араас сылларга Иван Гоголев-Кындыл, Наталья Харлампьева, Анатолий Старостин, Елена Слепцова-Куорсуннаах, Иван Иннокентьев, Ариадна Борисова, Михаил Иванов, Любовь Демина уо.д.а. прозаларын уонна поэзияларын билсибиттэрэ.
Хаһыат соторутааҥҥы, о.э. атырдьах ыйын 15 күнүнээҕи нүөмэригэр Арассыыйа Суруйааччыларын сойууһун чилиэнэ, бэйиэт уонна кириитик Ольга Корякина-Умсуура хоһоонноро “Запах весны” диэн ааттанан, Аита Шапошникова уонна Виктор Широков тылбаастарыгар ааҕааччы дьүүлүгэр таҕыстылар. Ону сэргэ прозаик, драматург, Арассыыйа Суруйааччыларын сойууһун чилиэнэ Александр Седалищев “Прасковья” кэпсээнэ бэчээттэннэ. Сурунаал Александр Седалищев быйыл В.Г.Распутин аатынан Национальнай литературнай бириэмийэ “За верность заветам сибирской прозы” анал номинациятынан бэлиэтэммитин тоһоҕолоон суруйда.