Анал байыаннай дьайыы зонатыгар баар Саха сирин тирэх пуунун үлэһиттэрэ биир нэдиэлэ иһигэр байыастар быстах кэмҥэ олохсуйар пууннарыгар 12-тэ тахсан кэллилэр. Байыаннай сулууспалаахтарга 36 аадырыстаах баһыылка тиэрдилиннэ.
Бу туһунан брифиҥҥэ АБДь зонатыгар өрөспүүбүлүкэ тирэх пууннарын кылаабынай координатора, «Юстас» позывнойдаах салайааччы иһитиннэрдэ.
«Саха сирин байыастарыгар биир УАЗ мааркалаах массыына туттарылынна. Өрөмүөннүүр бөлөх мэхээньиктэрэ биир анал тиэхиньикэни чөлүгэр түһэрдилэр уонна эбии 11 тиэхиньикэни өрөмүөннүү сылдьаллар», – диэн кэпсээтэ кини. Салайааччы этэринэн, фроҥҥа сураҕа суох сүтпүт өрөспүүбүлүкэ байыастарын көрдөөһүн мэлдьи ыытыллар.
«РФ Оборуонаҕа министиэристибэтин Кылаабынай координационнай киинин бэрэстэбиитэллэрин кытта бииргэ үлэлэһэн, өрөспүүбүлүкэттэн сылдьар сураҕа суох сүппүт байыаннайдар хайдах, ханна сүппүттэрин быһаарарга уонна кинилэри билинэргэ бары наадалаах дьаһаллар ылыллаллар», — диэн түмүктээтэ «Юстас».
Санатан эттэххэ, анал байыаннай дьайыы кыттыылаахтарын өйүүр үлэни Саха сирин Ил Дархана Айсен Николаев салайар «Кыайыыга — бииргэ!» өрөспүүбүлүкэтээҕи хамыыһыйа сүрүннүүр .
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.