Сииттэ нэһилиэгин оҕолоро хаһыс да сылын ыҥырыыбытын ылынан, субуотунньукка кэлэн кытталлар.
Оҕолор футболлуур былаһааккаларын кыһаллан туран ыраастаатылар, кэрэ көстүүлээх миэстэлэрэ, уулуссалара тупсаҕай көрүҥнэммиттэрин көрөн, ис сүрэхтэриттэн астыннылар. Сайын оскуола үлэһиттэрэ сынньанар кэмнэригэр, бу үлэни барытын олохтоох култуура киинин үлэһиттэрэ салайан, араас интэриэһинэй күрэхтэһиилэри, волонтерскай үлэни көҕүлээн ыыталлара үгэскэ кубулуйда.
Олохтоох дьаһалта салалтата ханнык да түгэҥҥэ көмө көрдөстүбүт да уталыппакка күүс-көмө, сүбэ-ама буоларыгар махтанабыт. Ити курдук оҕолорбут кыра эрдэхтэриттэн дойдуларыгар тапталлара, кыра да көмөлөрө туһалаах буоларын өйдүүллэрэ хайаан да наадалаах. Төрөөбүт дойду инники эрэллэрэ, кэскиллэрэ кинилэр буоллахтара. Онон көхтөөхтүк кыттыбыт оҕолорго, көҥүллээн ыыппыт төрөппүттэргэ барҕа махталбытын тиэрдэбит.
Марианна Сивцева.