Саха сирэ «Профессионалитет» бырайыагынан ыытыллыбыт федеральнай күрэх сүүмэрдээһинигэр инники күөҥҥэ таҕыста. Өрөспүүбүлүкэ баһылыга Айсен Николаев иһитиннэрбитинэн, эрэгийиэн дойдуга 2-4-с миэстэлэри үллэстибит уонна Уһук Илиҥҥэ бигэргэтиллибит сайаапка ахсаанынан 1-кы миэстэни ылбыт. 2027 сылга өрөспүүбүлүкэ федеральнай бүддьүөттэн 660,5 мөл. солкуобайы ылыаҕа. Бу үп-харчы олохтоох кэллиэстэр уонна тиэхиньикумнар баазаларыгар сэттэ саҥа үөрэх кластерын сайыннарыыга туһуланыаҕа.
Күрэх кыайыылаахтарыттан биирдэстэринэн 100 мөл. солкуобай суумалаах граны сүүйбүт «Айар Уустар» креативнай индустриялар кэллиэһэ буолла. Сайаапканы бэлэмнииргэ уонна үбү киллэрэргэ үөрэх кыһатын партнера — Өрөспүүбүлүкэ сайдыытын корпорацията — көмөлөстө. Субсидия чэпчэки бырамыысыланнас салаатыгар үөрэх-производственнай кластеры тэрийиигэ туһуланыаҕа. Кэллиэскэ материальнай-тэхиниичэскэй баазаны саҥардар былааннанар: аудиториялары саҥардыахтара, саҥа мастарыскыайдары аһыахтара уонна устудьуоннары идэҕэ үөрэтэргэ үрдүкү технологиялаах тэрилинэн хааччыйыахтара.
Кэллиэс дириэктэрэ Елена Яковлева быһаарбытынан, үөрэх кыһата «Креативнай индустриялар» хайысхатынан күрэххэ биэс сыл устата кыттыбыт. Быйыл искусство уонна креативнай индустриялар профилынан лот суоҕа биллибит. Онон салалта сайаапканы эмиэ креативнай секторга киирсэр чэпчэки бырамыысыланнас салаатыгар сөп түбэһиннэрэн уларытарга быһаарыммыт. Яковлева этэринэн, бу кыһа сайдыытын концепциятын толору хат көрүүнү эрэйбит. Кини Сайдыы корпорациятыгар бырайыагы бэлэмнээһин бары түһүмэхтэригэр бары өттүнэн өйөөбүтүн иһин махтанна. «Биһиги устудьуоннарбыт дойду бастыҥ тэрилинэн үөрэниэхтэрэ, бастакы куурустан саҕалаан, дьиҥнээх идэни баһылыахтара», — диэн Елена Яковлева эттэ.
«Профессионалитет» федеральнай бырагырааматын сүрүн ирдэбилэ — устудьуоннары үөрэтиигэ биисинэс быһаччы кыттыыта буолар. Кэллиэс индустриальнай партнердарынан Саха сирин сэттэ тэрилтэтэ буолла: СӨ Сайдыытын корпорацията уонна кини партнердара, «Айар», «Сардаана», «Хоту Тент», «Сахабулт» хампаанньалар, «Кэрэ» фотостудия уонна «Пространство» айар платформа. Кинилэр кыттыылара кэлэр кэскиллээх исписэлиистэри бэлэмнээһини хааччыйыаҕа.