Саха Өрөспүүбүлүкэтин Бырабыыталыстыбатын бэрэссэдээтэлин бастакы солбуйааччыта Дмитрий Садовников өрөспүүбүлүкэ Бырабыыталыстыбатын түмүктүүр отчуотун кэмигэр 2025 сыллааҕы халаан уутун туругун уонна эмсэҕэлээбит улуустар олохтоохторугар оҥоһуллубут өйөбүл дьаһалларын туһунан кэпсээтэ.
Кини бэлиэтээбитинэн, сааскы кэмҥэ өрөспүүбүлүкэҕэ улахан ыксаллаах быһыы-майгы тахсыбатаҕа, ол эрээри сайыҥҥы кэмҥэ Индигиир өрүскэ уу күүскэ кэлэн Өймөкөөн, Муома уонна Абый улуустарын хаппыта. Айылҕа алдьархайа улахан хоромньуну аҕалбыта, ол эрээри былаас уорганнарын үлэлэрин түмүгэр нэһилиэнньэҕэ көмө кылгас кэм иһигэр оҥоһуллубута.
«Өскөтүн сааскы кэми ылар буоллахха, биһиэхэ улахан ыксаллаах быһыы-майгы үөскээбэтэҕэ. Оттон сайыҥҥы кэмҥэ Индигиир өрүскэ буолбут быһылаан үс улууһу — Өймөкөөнү, Муоманы уонна Абыйы таарыйда. Ол эрээри бырабыыталыстыба уонна өрөспүүбүлүкэ салалтатын үлэтинэн биһиги бириэмэтигэр материальнай көмөнү оҥорбуппут диэн билиниэххэ наада. 1592 сайаабылыанньа киирбитэ, 41 мөл. солкуобай кэриҥэ үбүнэн материальнай көмө оҥоһулунна», — диэн бэлиэтээтэ Дмитрий Садовников.
Эбии Саха сирин Ил Дархана Айсен Николаев быһаарыытынан 119 дьиэ кэргэҥҥэ аадырыстаах көмө оҥоһулунна, кинилэр хас биирдиилэрэ 200 тыһыынча солкуобайы ыллылар. Дьиэлэрин сүтэрбит олохтоохторго кылгас кэм иһигэр икки чааһынай дьиэ тутулунна уонна элбэх кыбартыыралаах дьиэттэн үс кыбартыыра бэрилиннэ. Ону таһынан Дмитрий Садовников Ыччат дьыалаларыгар уонна социальнай коммуникацияларга министиэристибэ кылаатын бэлиэтээтэ, кинилэр көмөлөрүнэн устудьуоннар этэрээттэрин үлэтэ тэриллибитэ.