Саха сиригэр «Ыраас Арктика» («Чистая Арктика») федеральнай экологическай бырайыак чэрчитинэн, быйыл Аллайыаха, Анаабыр, Булуҥ, Үөһээ Дьааҥы, Аллараа Халыма уонна Усуйаана улуустарыгар сири-уоту тимир тобоҕуттан ыраастыахтара. Бу туһунан Саха сирин Бырабыыталыстыбатын бэрэссэдээтэлин солбуйааччы Ольга Балабкина Аллаайыха улууһун Чокуурдаах бөһүөлэгин олохтооҕуттан Бырабыыталыстыба түмүктүүр отчуотугар киирбит ыйытыыга хоруйдууругар иһитиннэрдэ.
«Өрөспүүбүлүкэ Арктика улуустарыгар 2021 сылтан “Ыраас Арктика” экологическай бырайыак олоххо киллэриллэр. Кини сүрүн сыала — волонтердар көмөлөрүнэн Арктика сирдэрин мунньуллубут тимир тобоҕуттан, бөхтөн-сыыстан ыраастааһын. Быйыл маннык дьаһаллары алта Арктика улууһугар, ол иһигэр эһиэхэ, Аллайыахаҕа, ыытар былааннанар. Үлэни быйыл от ыйыттан балаҕан ыйыгар диэри ыытыахпыт», – диэн Ольга Валерьевна түмүктээтэ.
Санатан эттэххэ, «Ыраас Арктика» федеральнай бырайыак Саха сиригэр 2021 сыллаахха Тиксии бөһүөлэгиттэн саҕаламмыта