Ил Дархан «Быһа лииньийэтин» кэмигэр “Хаарбах дьиэттэн көһөрүү” бырагыраама бастакы түһүмэҕэр түбэспит дьон өссө да көһүөхтээх дьиэлэрэ Нерюнгрига киирэ илигин, хаһан киириэҕин туһунан ыйыттылар.
Хомойуох иһин, бастакы түһүмэххэ – 2017 сыл тохсунньу 1 күнүгэр диэри — бу бырагырааманан тутуллуохтаах 16 дьиэ киирбэккэ турар.
“Ситэ тутуллубакка хаалбыт дьиэлэр араас оройуоннарга бааллар, биричиинэлэрэ араас. Үлэлии сатыыр хампаанньаларга бырабыыталыстыба көмөлөһөр, оттон эбийиэктэрин тутуутун бырахпыт хампаанньаларынан борокуратуура дьарыктанар, боппуруос хонтуруолга турар, — диэтэ Ил Дархан. – Иккис түһүмэххэ түбэспиттэргэ үбүлээһин өттүнэн уустук кэм, ол гынан баран эбии үбүлээһин көрүллүөҕэ. Уонунан тыһыынча киһи хаарбах дьиэттэн саҥа дьиэҕэ көһүөҕэ”.