Российскай Федерация Оборуонатын министиэристибэтигэр анал тиэхиньикэни уонна тэрили оҥорор саха тэрилтэлэрин бэрэстэбиитэллэрин кытта үлэ мунньаҕа буолла. Биэдэмистибэ Саха сирин тэрилтэлэрин оҥоһуктарыгар үрдүк сыанабылы биэрдэ.
Бу туһунан нэдиэлэтээҕи брифиҥҥэ Гражданскай оборуона дьыалаларыгар миниистирэ Дмитрий Лепчиков иһитиннэрдэ.
Тэрээһиҥҥэ «ЯКТ-СОКОЛ» квадроцикллары, «ТИМИР АТ» электроматасыыкыллары, «ЯК-14», «Камикадзе», «Хотой-15» беспилотниктары, ону тэҥэ моносыарҕалары уонна дрону утары ботуруоннары оҥорооччулар кыттыбыттар.
«Тиэхиньикэ министиэристибэ иһинэн мэлдьи үлэлиир быыстапкатыгар киллэрилиннилэр, туһалаах сүбэлэр бэрилиннилэр, уонна билиҥҥи кэмҥэ фроҥҥа наадалааҕы учуоттаан, олору тупсарарга бииргэ үлэ салҕанар», – диэн миниистир чуолкайдаата.
Кини эбэн эппитинэн, Аллараа Бэстээхтэн байыаннай дьайыыга ыытыллар сиригэр тиэхиньикэлээх уонна гуманитарнай көмөлөөх улахан таһаҕас массыыната айаннаабыт. Массыына айанныырыгар Алдаҥҥа уонна Нерюнгрига гуманитарнай көмөнү эбии тиэйиэхтэрэ.
«Саха сирин тэрилтэлэриттэн уонна олохтоохторуттан байыаннай сулууспалаахтарбытыгар баһыылкалары, массыыналары уонна тэриллэри хомуйуу, тиэрдии салҕанар. 2024 сыл саҕаланыаҕыттан өрөспүүбүлүкэттэн байыаннай дьайыы зонатыгар 36 рейс оҥоһулунна, 99 тиэхиньикэ, 174 туонна гуманитарнай көмө уонна аадырыстаммыт таһаҕас тиэрдилиннэ», – диэн миниистир иһитиннэрдэ.
Санатан эттэххэ, байыаннай дьайыыны өйүүр үлэни Саха сирин Ил Дархана, «Биир ньыгыл Арассыыа» баартыйа Саха сиринээҕи салаатын сэкирэтээрэ Айсен Николаев салайааччылаах «Кыайыыга бииргэ!» Өрөспүүбүлүкэтээҕи хамыыһыйата дьаһайар.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата