Бу күннэргэ Москва куоракка Арассыыйа дьахталларын сойууһун пуорумугар Саха сириттэн айар куттаах маастардар, этно-бөлөхтөр уонна култуура үлэһиттэрин улахан дэлэгээссийэтэ үрдүк таһымнаахтык кыттан кэллэ.
Норуоттар сомоҕолоһууларын уонна Култуура сылларын чэрчитинэн ыытыллыбыт тэрээһин туһунан Нам улууһуттан Лариса Тимофеева маннык сырдатта:
— Пуорумҥа Нам, Хаҥалас, Сунтаар, Таатта, Мэҥэ Хаҥалас, Дьааҥы, Анаабыр, Аллараа Халыма, Ньурба, Өлүөхүмэ, Алдан, Ленскэй улуустарыттан уонна Дьокуускай, Мииринэй куораттарыттан барыта 24 норуот маастара, 17 төрүт муусуканы толорооччу уонна култуура эйгэтин үлэһиттэрэ ситиһиилээхтик кытыннылар.
Кинилэр бэйэлэрин айар талааннарынан норуоттар икки ардыларынааҕы истиҥ сибээһи уонна эйэни бөҕөргөтүүгэ кылааттарын киллэрдилэр.
Быйыл «Хотугу сир дьахталларын эйгэтэ» (“Мир женщин Севера”) эрэгийэннээҕи уопсастыбаннай түмсүү салайааччыта, СӨ норуодунай худуоһунньуга Анна Зверева култуура эйгэтигэр үлэлээбитэ — 50, түмсүү тэриллибитэ 30 үбүлүөйдээх сылларын бэлиэтииллэр. Түмсүү тэриллиитигэр, айымньылаах үлэтигэр Анна Николаевна сүҥкэн оруоллаах.
Уопсастыбаннай тэрилтэ Саха сирин норуотун маастарыстыбатын уонна төрүт идэтин салгыыр, араҥаччылыыр, чөлгө түһэрэр уонна кэлэр көлүөнэҕэ тиэрдэр сыаллаах — соруктаах киин буолар. Түмсүү өрөспүүбүлүкэ араас муннуктарыттан талааннаах маастардары биир сомоҕо гынан ситимниир. Маастардарбыт өбүгэ үгэһин чөлүнэн илдьэ сылдьан, былыргы технологиялары аныгы култуура эйгэтигэр дьүөрэлээн, иккис тыыны биэрэллэр. Бу үтүө дьыаланы көҕүлээччи уонна барытын түмээччи Анна Зверева өр сыллаах бэриниилээх, таһаарыылаах үлэтэ үрдүктүк сыаналанна. Арассыыйа дьахталларын сойууһун бэрэссэдээтэлэ Екатерина Лахова көхтөөх уопсастыбанньык Анна Звереваҕа «Посол культуры Союза женщин России» үрдүк ааты иҥэрэн, түөскэ кэтиллэр бэлиэни уонна «Арассыыйа дьахталларын сойууһа» мэтээли үөрүүлээх быһыыга-майгыга туттарда.
Дэлэгээссийэ чилиэннэрэ Москва куорат историческай уонна култуурунай эйгэтин кытта билэр соруктаах экскурсияларга сырыттылар. Түмэллэргэ сылдьыы маастардар үлэлэригэр сонун сүүрээни саҕара чахчы.