Ил Түмэн спикерэ Алексей Еремеев мунньах түмүгүн иһитиннэрдэ:
“Бэбиэскэҕэ 29 боппуруос баар этэ, бастакы барылларыгар көрүллэр, иккис, үһүс ааҕыыларын барар сокуоннар бааллар. Ону таһынан балачча элбэх уурааҕы көрдүбүт. Счетнай палаата 2025 сыллааҕы отчуотун үлэтин-хамнаһын көрдүбүт. Счетнай палаата судаарыстыбаннай быраагырамаларбыт өрөспүүбүлүкэ бүддьүөтүттэн хайдах ороскуоттаммыттарын, үп-харчы хайдах туттуллубутун хонтуруоллуур уорган. Дьокутааттар да, кэмитиэттэр да Счетнай палаата үчүгэйдик үлэлээбитин бэлиэтээтилэр. Счетнай палаата бу састааба сүрдээх үчүгэйдик үлэлиир диэн этиэхпин баҕарабын. Ороскуоту барытын үчүгэйдик ырытан көрөр, тиийиэхтээх уорганнарыгар тиэрдэр, уонна аналитика быһыытынан көдьүүһэ суохтук туһаныллар бүддьүөт ороскуоттарын атын ньыманан туттуоҕуҥ диэн этиилэри киллэрэн турар. Ону биһиги судаарыстыбаннай бүддьүөтү ылынарбытыгар Ил Түмэн, Үп министиэристибэтэ, СӨ бырабыыталыстыбата сүрдээҕин туһанабыт.
Киһи быраабын араҥаччылыыр уонна урбаанньыттар бырааптарын араҥаччылыыр уполномоченнайдар отчуоттарын иһиттибит. Үс мировой судьуйа боломуочуйатын бигэргэттибит уонна быыбардаатыбыт. Уопсастыбаннас аатыттан судьуйалар квалификационнай коллегияларыгар киирэр дьону кистэлэҥ куоластааһынынан таллыбыт. Виктор Губарев оннугар реском бастакы сэкирэтээрин Вячеслав Куличкины КПРФ аатыттан дьокутаат быһыытынан боломуочуйатын бигэргэттибит. Иванов Александр Игнатьевиһы* РФ Юстицияҕа министиэристибэтэ “иноагент” реестригэр киллэрбитинэн сибээстээн, 414 федеральнай сокуоҥҥа олоҕуран, отут хонуктан итэҕэһэ суох кэмҥэ көрөн баран боломуочуйатыттан босхолоотубут. Поскачин Владимир Семенович кулун тутар 19 күнүгэр Буруйданааһын туһунан холуобунай дьыалаҕа уурааҕа сокуоннай күүскэ киирбитэ. Ону эмиэ 414 федеральнай сокуон ирдэбилинэн отут хонуктан итэҕэһэ суох кэмҥэ көрөн баран боломуочуйатын тохтоттубут.
Сэттэ федеральнай көҕүлээһиҥҥэ бэйэбит этиилэрбитин бу уураах быһыытынан ылынныбыт.
*РФ Юстицияҕа министиэристибэтинэн (Минюст) омук агеннарын реестригэр киллэриллибит.