Ил Түмэн пресс-сулууспата иһитиннэрэринэн, парламент уочараттаах мунньаҕын биир сүрүн боппуруоһунан дьокутаат Александр Иванов* боломуочуйатын болдьоҕун иннинэ тохтотуу буолуоҕа. Маныаха олунньу 27 күнүгэр дьокутааты омук агеннарын (иностранный агент) реестригэр киллэрбиттэрэ төрүөт буолла.
«РФ субъектарыгар аһаҕас былаас тэриллиитин уопсай бириинсиптэрин туһунан» федеральнай сокуон 19-с ыстатыйатын 21-с чааһыгар сөп түбэһиннэрэн, омук агенын статуһун ылыы дьокутаат боломуочуйатын болдьоҕун иннинэ тохтоторго туох да саарбаҕа суох төрүөтүнэн буолар. Ол курдук, бүгүн норуот дьокутаатыгар «Омук сабыдыалыгар түбэспит дьон үлэтин-хамнаһын хонтуруоллааһын туһунан» федеральнай сокуон 11-с ыстатыйатын 1 уонна 3 чаастарыгар сөп түбэһиннэрэн, кини пленарнай мунньахха кыттара кыаллыбатын туһунан иһитиннэрдилэр.
Реестиргэ киирбит физическэй сирэй аһаҕас былаас уорганнарыгар дуоһунаска олорор бырааба суох, ол иһигэр быыбарданар дуоһунастарга, судаарыстыбаннай гражданскай сулууспа уонна муниципальнай сулууспа дуоһунастарыгар үлэлиир, быыбардыыр уонна референдум хамыыһыйатын чилиэнинэн, судьуйалар квалификационнай коллегияларыгар уопсастыбаннас бэрэстэбиитэлинэн буолар, ону таһынан судаарыстыбаннай корпорациялар салайар уорганнарыгар киирэр кыаҕа суох. Маны тэҥэ омук агена аһаҕас былаас уорганнарын иһинэн тэриллибит хамыыһыйалар, кэмитиэттэр, сүбэлиир-амалыыр, экспертнэй уонна да атын уорганнар үлэлэригэр кыттар бырааба суох.
*РФ Юстицияҕа министиэристибэтинэн (Минюст) омук агеннарын реестригэр киллэриллибит.