Ааспыт икки ый устата Аҕа дойдуну көмүскээччилэр дьиэ кэргэттэрин кэмитиэтин (КСВО) «Правмобиль» көһө сылдьан тахсан үлэлиир пууннара биэс улууска үлэлээтилэр.
Байыаннай дьайыы кыттыылаахтарын уопсайа 147 дьиэ кэргэнэ сокуон өттүнэн көмөнү ылла. Бу туһунан бүгүн брифиҥҥэ Саха сиринээҕи КСВО салайааччытын солбуйааччы Альбина Винокурова иһитиннэрдэ.
««Правмобиль» Таатта, Мэҥэ Хаҥалас, Нам, Уус Алдан уонна Орто Халыма улуустарыгар сырыыларын устата байыаннай дьайыы кыттыылаахтарын дьиэ кэргэттэриттэн 228 сайаапка киирдэ. Быраап өттүнэн сүбэлэри биэриигэ Саха сиригэр Киһи быраабын боломуочунайа, байыаннай комиссариаттар үлэһиттэрэ, улуустар дьаһалталара, өрөспүүбүлүкэтээҕи тус министиэристибэлэр уонна сулууспалар бэрэстэбиитэллэрэ кытыннылар. Эрэгийиэн улуустарыгар тахсыылар барыта СӨ Ил Дарханын уонна Бырабыытылыстыбатын Дьаһалтатын өйөбүлүнэн тэрилиннилэр», – диэн бэлиэтээтэ спикер.
Альбина Винокурова улуустарга «Правмобиль» үлэтэ квалификациялаах босхо быраап өттүнэн көмө дьоҥҥо-сэргэҕэ олус наадалааҕын көрдөрдө диэн эттэ.
«Саха сирин улуустарыгар инникитин буолар сырыыларга федеральнай биэдэмистибэлэр уонна сулууспалар, борокуратуура уонна РФ Оборуонаҕа министиэристибэтин бэрэстэбиитэллэрин эмиэ кытыннарар былааннаахпыт», – диэн Саха сиринээҕи Аҕа дойдуну көмүскээччилэр дьиэ кэргэттэрин кэмитиэтин салайааччытын солбуйааччы Альбина Винокурова кэпсээтэ.
Санаттахха, Аҕа дойдуну көмүскээччилэр дьиэ кэргэттэрин кэмитиэтэ 2022 сыл ахсынньытыгар Арассыыйа Бэрэсидьиэнэ Владимир Путин көҕүлээһининэн тэриллибитэ. Сүрүн сыала – байыаннай дьайыыга кыттар байыаннай сулууспалаахтарга, кинилэр аймахтарыгар уонна олохторун толук уурбут буойуннар дьиэ кэргэттэригэр бары өттүнэн көмөнү оҥоруу. Саха сиригэр КСВО эрэгийиэннээҕи салаата 2023 сыл тохсунньутугар Саха сирин Ил Дархана, «Биир Ньыгыл Арассыыйа» баартыйа Саха сиринээҕи салаатын сэкирэтээрэ Айсен Николаев өйөбүлүнэн үлэтин саҕалаабыта. Ыстаап састаабыгар байыастарын уонна өлбүт байыаннайдар кэргэттэрэ, аймахтара үлэлииллэр, оттон салайааччынан анал дьайыы үс байыаһын ийэтэ Марина Бахилина буолар. Сиһилии: https://www.sakha.gov.ru/news/42330