Саха тылын сүмэтин сэргээччилэргэ, саха классик суруйааччыларын айымньыларын үлүһүйэн ааҕааччыларга анаан, Өлүөхүмэ улууһун Кыыллаах нэһилиэгин бибилэтиэкэтэ тэрилтэлэр икки ардыларыгар “Туос түннүк” бэстибээли тэрийэн ыытта.
Тэрээһин саха норуодунай суруйааччыта, Социалистическай Үлэ Дьоруойа, саха драматургията, сахалыы опера, балет сайдыытыгар сүҥкэн өҥөлөөх Дмитрий Кононович Сивцев — Суорун Омоллоон төрөөбүтэ 120, бастакы айымньыта – “Өлүөнэ өрүс” кэпсээнэ бэчээттэммитэ 100 сылларыгар ананар.
Бэстибээл саха норуодунай суруйааччытын айымньыларын, төрүт тыл сүмэтин, баайын кэнэҕэски ыччакка иҥэрэр сыалтан ыытылынна. Айымньылары көрөн дьиэ кэргэҥҥэ, үлэлиир кэлэктиипкэ ырытар, кэпсэтэр кыаҕы үөскэтэр соруктаах.
Бэстибээлгэ нэһилиэк түөрт тэрилтэтэ кытынна: оскуола кэлэктиибэ – “Аанчыгы”, уһуйаан – “Бэйэтэ эмтиэкэни”, олохтоох дьаһалта – “Ырыкыныап ыыспатын”, нэһилиэк бэтэрээннэрин, бочуоттаах сынньалаҥҥа олорооччуларын түмсүүтэ – “Хараҥаҕа тыкпыт сырдыгы”. Ол түмүгэр кэлэктииптэр көрөөччү биһириир ытыһын тыаһын истиэхтэрин иһиттилэр, көрүөхтэрин көрдүлэр. Сорохтор норуот суруйааччытын айымньыларын оҕо, эдэр сылдьан аахпыттарын хаттаан ааҕар, сөргүтэр кыахтара үөскээтэ. Атыттар, ис хоһоонун эндэппэккэ билэр көрөөччүлэр айымньы сыанаҕа туруоруллуутун кытта кинигэҕэ суруллуутун тэҥнээн көрөр кыахтаннылар. Ким эрэ бэстибээл кэнниттэн: “Бу айымньыны бибилэтиэкэттэн уларсан аахтахпына табыллар эбит” – диэбитэ саарбаҕа суох. Ол аата бэстибээл сыалын-соругун сиппит.
Икки күннээх көрүү түмүгүнэн 3-с үрдэли “Кыталык” уһуйаан кэлэктиибэ (туруорааччы М. Б. Корнилова), 2-с үрдэли нэһилиэк бэтэрээннэрин, биэнсийэлээхтэрин түмсүүтэ (туруорааччы Р.Е. Лавернова), 1-кы үрдэли олохтоох дьаһалта кэлэктиибэ (туруорааччы Ю.А. Корнилова) ыллылар. Добун аат оскуола кэлэктиибигэр тиксэн, кыайыы өрөгөйүн биллилэр (туруорааччы В.В. Кузьмина).
Кистэлэҥ дьүүлгэ биир дойдулаах суруйааччыбыт, элбэх кинигэ ааптара Р.Л. Данилов — Ородьумаан бэйэтин анал бирииһин Ырыкыныабы оонньообут Елена Егоровна Корниловаҕа, Макар оруолун толорбут Елизавета Семеновна Захароваҕа, Ньукууһу оонньообут Эльвера Борисовна Корниловаҕа, Дьаакыбы ааптар тылынан ып-ыраастык толорбут Василий Прокопьевич Егомиҥҥа туттартаата.
Тыл үөрэхтээх, айылҕаттан талааннаах хоһоонньут С.М. Захаров бэйэтин бирииһин таба көрөн астыммыт артыыһыгар Эльвера Борисовна Корниловаҕа туттарда.
“Күн Чаҕыла” дьахтар бастыҥ оруола анал ааттары ыллылар: Аанчыгы оонньообут Анастасия Петровна Иванова, Аанчык Хотунун оонньообут Светлана Николаевна Корнилова, Макар кэргэнин оонньообут Светлана Семеновна Корнилова.
“Күн Чаҕыл” анал аат эр дьоҥҥо бастыҥ оруола Дьаакыбы толорбут Егомин Василий Прокопьевичка уонна Сережа оруолун толорбут Федор Иванович Узоровка тигистэ. “Оҕо бастыҥ оруола” анал ааты Эльвера Борисовна Корнилова ылла.
Бэстибээл кыттыылаахтарыгар, туруорааччыларга, бирииспин буһаран бэлэмнии охсубут Ларионова Вера Семеновнаҕа, Павлова Саргылана Владимировнаҕа, сорук оҥостон икки күн устата үлэлээбит дьүүллүүр сүбэҕэ — Корнилова Ю.А., Банчина Т.А., Корнилова И. С., Данилов Р.Л., Захаров С.М., сыананы бэлэмнээбит, аппаратуранан, музыканан хааччыйбыт Акимова О.А. махталбын тириэрдэбин!
“Туос түннүк” бэстибээл сыалын ситтэ!
Туругурдун төрүт тыл!
Айхалланнын ийэ тыл!
Раиса ЛАВЕРНОВА.