Ил Дархан Айсен Николаев халаан уутугар уонна баһаарга анаммыт Ыксаллаах быһыы-майгы хамыыһыйатын мунньаҕын ыытта.
Эрэгийиэн баһылыга адьас кылгас болдьох иһигэр нэһилиэнньэлээх пууннарга халаан уутун содула туоратыллыахтаах диэн соругу туруорда.
Ыам ыйын 21 күнүн туругунан алта улуус 12 нэһилиэнньэлээх пуунугар ууга барыы бэлиэтэннэ: 142 тиэргэн уонна 37 олорор дьиэ.
Билигин Өлүөнэҕэ көмүөл Кэбээйи улууһунан ааһан иһэр. Алын өттө Бүлүү төрдүн аллараа өттүгэр баар. Сангаар бөһүөлэгэр уу таһыма 1114 см, кутталлааҕа 1315 см. Сангаар уонна Бүлүү төрдүн икки ардыгар муус харыыта буолуон сөптөөҕүнэн, Айсен Николаев үөһэттэн кэтээн көрүүнү уонна наада буоллаҕына дэлби тэптэрэр быһаарыыны ылынары соруйда.
Мунньахха ураты болҕомто баһаар кутталлаах кэмэ саҕаламмытыгар уурулунна. Өрөспүүбүлүкэҕэ 59 айылҕа баһаара, ол иһигэр уопсай иэнэ 500 га кэриҥнээх ойуур баһаара, 728 га иэннээх ландшафтнай баһаар буолбут. Балаһыанньа былырыыҥҥытааҕар арыый үчүгэй.
Умайыы барар биричиинэтинэн киһи буолар. Ол иһин Ил Дархан буруйдаахтары булан ылары, нэһилиэнньэни кытта үлэни күүһүрдэри эттэ. Маны тэҥэ, киин уонна илин эҥэр улуустарга искусственнай ардаҕы түһэрэр үлэни тэтимирдэллэригэр соруйда. Кини бу дьаһалларга үбүлээһин наада буоллаҕына түргэнник улаатыннарыахха наадатын эттэ.
СӨ Ил Дарханын уонна Бырабыыталыстыбатын пресс-сулууспата.