Ааспыт сылга 804 эдэр ыал 50 тыһыынча солкуобай кээмэйдээх эбии өйөбүлү ылла, бу сыалга 40,2 мөл. солкуобай ыытылынна. Онтон 2022 сыллаахха маннык өйөбүл 940 Саха сирин олохтооҕор 47 мөл. солкуобай суумаҕа оҥоһуллубута.
Өрөспүүбүлүкэҕэ эдэр ыаллары өйүүр үлэ дойду Бэрэсидьиэнэ Владимир Путин көҕүлээбит «Дьиэ кэргэн» уонна «Ыччат уонна оҕолор» национальнай бырайыактарын, ону таһынан «Биир ньыгыл Арассыыйа» баартыйа норуодунай бырагырааматын «Чэгиэн кэскил» бырайыагын чэрчитинэн ыытыллар.
«Биһиги уһун болдьохтоох историческай сорукпут норуоппутун харыстыырга уонна элбэтэргэ сытар. Билиҥҥи балаһыанньаны уонна баар уустуктары аахсыбакка, биһиги бу хайысханы тутуһуохтаахпыт. Төрөөһүн үрдээһинэ, оҕолоох ыаллары өйөөһүн уонна гражданнар чэгиэн олохторун уһатыы – бу биһиги бииргэ үлэлиир сүрүн хайысхаларбыт», – диэн Арассыыйа Федерациятын Бэрэсидьиэнэ Владимир Путин урут бэлиэтээбитэ.
Биирдэ бэриллэр харчынан төлөбүр эдэр ыалга кэргэнниилэртэн биирдэстэригэр Арассыыйа гражданствота уонна Саха Өрөспүүбүлүкэтин сиригэр-уотугар олороро баар буоллаҕына ананар. Өйөбүл бастакытын ыал буолар дьоҥҥо бэриллэр, онуоха иккиэн саастара 25-тэн тахсыа суохтаах.
Сайабылыанньаны ыал буолбуту судаарыстыбаннай регистрациялааһын күнүттэн алта ыйтан хойутаппакка биэриэххэ наада. Төлөбүрү ыларга нэһилиэнньэни социальнай көмүскэл уорганыгар эбэтэр e-yakutia.ru портал нөҥүө сайаапкалыахха сөп.
«Күүстээх Саха сирэ кытаанах уонна дьоллоох дьиэ кэргэнтэн саҕаланар. Ол иһин эдэр төрөппүттэри уонна олох суолун саҥа саҕалыыр дьону өйөөһүн өрөспүүбүлүкэ сүрүн соруктарыттан биирдэстэрэ буолар.Дьиэ кэргэн туһугар кыһамньы – бүтүн Саха сирин кэскилин туһугар кыһамньынан буолар», – диэн Саха Өрөспүүбүлүкэтин Ыччат дьыалаларыгар уонна социальнай коммуникацияларга миниистирэ Петр Шамаев бэлиэтээтэ.
Санатан эттэххэ, иллэрээ сыл Саха сирин Ил Дархана Айсен Николаев ыйааҕынан өрөспүүбүлүкэҕэ 25-гэр диэри саастаах, бастакытын ыал буолар эдэр дьоҥҥо биирдэ бэриллэр төлөбүр киллэриллибитэ. Кээмэйэ 50 тыһыынча солкуобайга тэҥ.