Маҕаһыыннар полкаларыгар мас арыытын арааһа олус элбэх буолан, хаачыстыбалаах табаары талар уустук. Маннык түгэҥҥэ албыҥҥа хайдах киирэн биэрбэккэ уонна арыыны дьиэтээҕи усулуобуйаҕа хайдах бэрэбиэркэлиэххэ сөбүн туһунан Роскачество сүбэлэрин кытта билсиэҕиҥ. Бу туһунан URA.RU суруйар.
Мас арыытын хаачыстыбатын дьиэҕэ бэрэбиэркэлиир биэс ньыма
Куухуньаттан тахсыбакка эрэ, мас арыытын хаачыстыбатын хайдах бэрэбиэркэлиэххэ сөбүй? Албын табаары тута билиэххэ сөптөөх биэс судургу уонна эрэллээх ньыма баар.
1. Кумааҕынан тургутуу
Көннөрү ыстакааны ылыҥ, онно кыра арыыны кутан баран, айаҕар кураанах кумааҕы салфетканан бүөлээн, ыга тутуҥ. Онтон ыстакааны түргэнник таҥнары эргитэн, салфеткаҕа хаалбыт суолу болҕойон көрүҥ. Суола, кытыылара көнө буоллаҕына, бородуукта ыраас диэн буолар. Оттон арыы тарҕанан хаалбыт буоллаҕына, сэрэхэдийиҥ: оҥорон таһаарааччы уунан убаппыт буолуон сөп.
2. Тымныынан тургутуу
Бытыылкалаах арыыны икки чаас устата морозильникка угуҥ. Дьиҥнээх мас арыыта тымныыга хайаан да уларыйар: хойдор, көрүҥүнэн убаҕас мүөт курдук буолар. Оттон сойбутун кэннэ уруккутун курдук дьэҥкир уонна убаҕас хаалбыт буоллаҕына бытыылка иһигэр атын булкаастаах арыы баар буолуон сөп.
3. Йодунан бэрэбиэркэлээһин
Дьэҥкир үрүүмкэҕэ кыра арыы кутан баран, үрдүгэр йоду сэрэнэн таммалатыҥ. Хаачыстыбалаах бородуукта йод таммаҕа мунньуллан, кыра мээчик курдук буолан, үрдүгэр устар эбэтэр түгэҕэр түһэр. Оттон йод тута ууллан, үрүүмкэ иһинээҕитин кирдээх бороҥ өҥнөөтөҕүнэ, сымыйа арыы. Бу арыыга уу эбэтэр чэпчэки сыаналаах тэхиньиичэскэй сыалар баалларын көрдөрөр.
4. Ас тууһа
Арыылаах иһиккэ биир кыра ньуоска ас тууһун кутуҥ. Айылҕа бородууктугар туус түгэҕэр сөҥөн хаалыа, оттон булкаастаах арыыга ууллан хаалыа.
5. Итии хобордооххо бэрэбиэркэлээһин
Итии хобордооххо кыра арыыны кутуҥ. Хаачыстыбалаах бородуукта үрдүк температураны үчүгэйдик тулуйар — буруолуо суохтаах. Күүгэн атын эбиликтэр баалларын туоһулуур, оттон буруо арыы итиини тулуйбатын уонна албын табаар буоларын көрдөрөр. Маннык арыыны аска туттар доруобуйаҕа олус кутталлаах, тоҕо диэтэххэ, буруону кытта канцерогеннар тахсаллар.
Маҕаһыыҥҥа мас арыытын хайдах сөпкө талабыт?
Роскачество маҕаһыыҥҥа хаачыстыбалаах бородууктаны атыылаһарга туохха болҕомто ууруохха наадатын быһаарда. Доруобуйаҕа буортулаах албын табаары атыыласпат туһугар, бытыылкаҕа суруллубуту эрэ буолбакка, арыы тас көрүҥүн эмиэ үөрэтиэххэ наада.
Оҥорон таһаарааччылар атыылаһааччыны ымсыырдаары, үксүгэр улаханнык, киэргэтэн суруйаллар.
Туохха болҕомтону уурабыт
«Холодный отжим
Бу сурук битэмииннэр уонна микроэлеменнэр барытын кэриэтэ хаалларыллыбыттарын туоһулуур. Уонна атын аһыы сыта суох буолар.
«Вымороженное»
Бу рафинированнайа суох арыылартан саамай үрдүкү таһыма буолар. Арыыны бытааннык сойутан, кыратык булкуйаллар. Арыы дьэҥкир буолар уонна быдан уһуннук харайыллар.
Мас арыытын хайдах талыахха сөбүй?
- Өҥө. Үчүгэй рафинированнай арыы өрүү сырдык уонна дьэҥкир буолар. Арыы төһөнөн сырдык да, соччонон ыраастаныыта дириҥ буолар.
- Дьэҥкирэ. Рафинированнайа суох арыы түгэҕэр кыра сөҥүү баарыттан куттанымаҥ. Бу — фосфолипидтар, биһиги килиэккэлэрбитин эдэримситэр, организм бэйэтэ оҥорон таһаарбат сыаналаах веществолара.
- Хараҥа сири талыҥ. Сырдык уот — үүнээйи сыатын сүрүн өстөөҕө. Лаампа эбэтэр күн уотун анныгар арыы түргэнник аһыйар уонна туһатын сүтэрэр. Ол иһин өрүү саамай хараҥа муннугар эбэтэр стеллаж дириҥэр турар бытыылканы талар ордук.
- Болдьоҕо. Арыы болдьоҕо төһөнөн бүтэрэ чугас да, соччонон аһыйбыты атыылаһар куттал үрдүүр. Өскөтүн арыыны сылаас ыскылаакка эбэтэр лаампа анныгар уурбут буоллахтарына, суруллубут болдьоҕуттан быдан эрдэ буорту буолуон сөп.