Бу күннэргэ Горнай улууһун киинигэр олохтоох пааркаҕа, ытык Олоҥхо түһүлгэтигэр, ураты тэрээһин буолла.
Ол курдук 9 нэһилиэк 9 сэргэтин туруоруу үөрүүлээх сиэрэ-туома ыытылынна. Сэргэлэри туруорууну алгыһын алгысчыт Алгыстаан Дуруһаал оҥордо диэн улуус дьаһалтата иһитиннэрдэ.
- Бу үтүө саҕалааһын Маалтааны нэһилиэгиттэн төрүттээх аатырбыт олоҥхоһут Савва Максимов-Чоокуур Сааба сыдьааннарын көҕүлээһиннэринэн олоххо киирбитэ олус үөрдэр. Кинилэр Арассыыйа Бэрэсидьиэнин култуурунай көҕүлээһиннэрин пуондатын (ПФКИ) күрэҕэр кыайыылаах тахсан, бырайыактарын норуоппут култууратын харыстааһыныгар уонна Горнай улууһа төрүттэммитэ 95 сыллаах үбүлүөйүгэр анаатылар.
Бу бырайыак чэрчитинэн, Ыһыахпыт күнүгэр улууспут олоҥхоһуттарыгар аналлаах «Олоҥхоһут сиэнинээн» диэн өйдөбүнньүк бэлиэ аһыллыаҕа, — диэн улуус дьаһалтата ТГ ханаалыгар иһитиннэрдэ.
