Кытай Арассыыйаны кытта визата суох эрэсиими 2027 сыл ахсынньы 31 күнүгэр диэри уһатарга быһаарынна. Бу туһунан КНӨ Тас дьыалаларга министиэристибэтин официальнай бэрэстэбиитэлэ Го Цзякунь брифинг кэмигэр иһитиннэрдэ диэн ТАСС суруйар.
Дипломат этэринэн, көннөрү паспардаах Арассыыйа гражданнара Кытайга дьыалабыай айаҥҥа, туризмҥа, аймахтарыгар уонна доҕотторугар ыалдьыттыы, ону тэҥэ атастаһыы эбэтэр транзит сыалынан 30 хонукка диэри визаны оҥотторбокко эрэ киирэр кыахтаахтар.
Маннык быһаарыы Кытай уонна Арассыыйа икки ардыгар гуманитарнай атастаһыылары салгыы судургутутар туһуттан ылыллыбыта бэлиэтэнэр. Арассыыйа эмиэ бэйэтин өттүттэн Кытай гражданнарыгар визата суох эрэсиими 2027 сылга диэри уһатыаҕа.
РФ Бэрэсидьиэнин пресс-сэкиритээрэ Дмитрий Песков ТАСС ыйытыытыгар хоруйдууругар, Арассыыйа өттүттэн эмиэ манна тэҥнээх хардыы оҥоһуллуоҕун бигэргэттэ. «Визата суох быраактыка бэйэтин олус үчүгэйдик көрдөрдө», — диэтэ кини.