Национальнай бырайыак: Нам улууһугар 1880 тахса киһи саҥа дьиэлэннэ

«Было-стало»

Дойдубут үрдүнэн үлэлээбит «2019-2025 сылларга хаарбах уонна саахалланар туруктаах дьиэттэн гражданнары көһөрүү» федеральнай программа I-кы уонна II-с түһүмэхтэрин чэрчитинэн, региональнай программаҕа Нам улууһуттан 17 нэһилиэк хапсан кытынна. Уопсайа 28 672,65 м2. иэннээх 94 элбэх квартиралаах дьиэ 631 квартиратыгар олорбут 1884 киһи саҥа уопсай дьиэлэринэн хааччылынна, диэн суруйар «Эҥсиэли» хаһыат.

Владимир Путин көҕүлээбит «Олох инфраструктурата» национальнай бырайыак иитинэн 2026 сылтан «Саахалланар туруктаах дьиэттэн гражданнары көһөрүү» программа III-с түһүмэҕэ саҕаланна. Ол курдук, 01.12.2025 с. туругунан 2017 сыл тохсунньу 1 күнүн кэнниттэн Нам улууһугар 183 элбэх квартиралаах уопсай дьиэ, барыта 37 954,21 кв.м. иэннээх 792 квартира, саахалланар туруктааҕынан уонна көтүллүөхтээҕинэн билиниллибит. Бу уопсай дьиэлэр тустарынан иһитиннэрии «Территориялары сайыннарыы фондата» ППК АИС систиэмэтигэр киллэриллибит. Билигин манна бэлэмнэнии үлэ бара турар.

Нам сэлиэнньэтигэр саҥа уопсай дьиэлэргэ көспүт дьон санаалара.

Северина Соловьева, Нам с. олохтооҕо:

— Биһиги 2024 сыллаахха олунньу, кулун тутар ыйдарга саҥа үс мэндиэмэннээх уопсай дьиэҕэ көспүппүт. Итиннэ хапсан толору хааччыллыылаах дьиэҕэ киирэн наһаа үөрэн, дуоһуйан олоробун. Миэнэ студия-кыбартыыра, сылаас, сырдык, барыта баар. Үчүгэйэ диэн урут олорбут киин кыбаарталбар хааллым, сорохтор тэйиччи сирдэргэ көстүлэр. Наһаа туһалаах программа үлэлээн, олоххо киирэн, дьон олоҕун хаачыстыбатын биллэрдик тупсарда. Кыһамньыларын иһин барыларыгар махтанабын.

Полина Емельянова, Нам с. олохтооҕо:

— Биһиги саҥа 3 этээстээх уопсай дьиэҕэ тиксибит кыбартыырабыт күлүүһүн 2024 с. ахсынньытыгар үөрүүлээх быһыыга-майгыга туппуппут уонна 2025 с. олунньутугар сууйан-тараан, көһөн киирбиппит. Кыбартыырабыт 1 хостоох, толору хааччыллыылаах, 40 кв.м. иэннээх. Сэрэбиэйгэ 2-с этээскэ уонна күн көрөр өттүгэр түбэһэн үөрбүппүт.

Урут олорбут Строительнай уулусса 4-гэр баар уопсай дьиэбитигэр оҕолорбут төрөөбүттэрэ, улааппыттара. Онно 1-кы этээскэ олорбуппут, дьиэбит муостата олус тымныы этэ. Бэйэбит оҥосто сатыырбыт, “сылытар муоста” оҥостон ону холбуур этибит.

Билигин саҥа сып-сылаас уопсай дьиэҕэ үчүгэй усулуобуйаҕа астынан олоробут. Бу дьоҥҥо көмөлөөх, тирэх буолар программаҕа хапсарбытыгар кыһамньыларын иһин улууспут дьаһалтатыгар уонна Ленскэй нэһилиэк дьаһалтатын баһылыгар Петр Григорьевич Сокольниковка, докумуоҥҥа болҕомтолоохтук сыһыаннаһан үлэлэспит специалиска Саина Петровна Корниловаҕа улахан махталбытын тиэрдэбит.

Хомустаах бастакы нэһилиэгэ

Нам улууһугар «Хаарбах уонна саахалланар туруктаах дьиэттэн көһөрүү» программа көмөтүнэн толору туһанан олорор Хомустаах Бастакы нэһилиэгэ буолар.

Нэһилиэккэ 2014 сылтан саҕалаан барыта 6 дьиэ тутуллубут, бу 4059.96 кв м иэҥҥэ тэҥнэһэр, 77 квартира саҥаҕа көһөрүллүбүт, бу иһигэр 7 тулаайах оҕо дьиэлэммит. Онон хаарбах туруктаах 9 дьиэ, 3022.20 кв.м көһөрүллүбүт.

Татьяна Филиппова, «50 лет ВЛКСМ» уул., 12 олохтооҕо, уопсай дьиэ комендана:

— Дьиэбитигэр киирбиппит 3 сыла буолла. Алта квартиралаах, икки этээстээх дьиэ. «Восток-капитал» ХЭТ тэрилтэ туппута. Кулун тутарга сыбаайа түһэрэн бараннар, сэтинньигэ күлүүспүтүн тутан дьиэбитигэр киирбиппит.

Подъезпытын ыраастык тутар инниттэн уочаратынан сууйабыт, атахпытын устан киирэбит. Кыстаабыт нөҥүө сылбытыгар олохтоохтор харчы бырахсан сабыылаах олбуор туппуппут. Сүрүн үлэтин дьиэбит олохтооҕо Соловьев Николай оҥорбута. Ааспыт кыһын хас биирдии квартираҕа муус уурар долбуур оҥорон туруорда. Эрдэ арболит дьиэҕэ олорбуппут. Бу уруккута совхоз дьиэтэ этэ. Манна ыанньыксыттар, совхоз араас үлэһиттэрэ олорбуттара.

«Хаарбах уонна саахалланар туруктаах дьиэттэн көһөрүү» программа нэһилиэк олоҕун тупсарда. Абыранныбыт. Дьиэбит тутуута хаачыстыбалаах, сылаас. Алдьаммакка-кээһэммэккэ үһүс кыһыммытын туораатыбыт. Түннүктэртэн үрбэт, балкоммут сабыылаах, түннүктэрдээх, табыгастаах. Уубутун-хаарбытын барытын көрүнэн, бэйэбит дьаһанан олоробут.

Улахан махталбытын олохтоох дьаһалтаҕа, баһылык Василий Гаврильевич Жирковка, специалист Владислав Владимирович Ушаковка тиэрдэбит. Кинилэр хас эмэ сылы быһа программаҕа анньыһан, бириэмэтигэр докумуонун эккирэтиһэн, туттаран, үчүгэй үлэлээх, хаачыстыбалаах тутуулаах тэрилтэни булан, дьиэ туттаран ылан, биһиэхэ буор-босхо саҥа кыбартыыралары бэлэхтээтилэр. Олорор дьиэбитигэр саастаах дьон элбэхтэр. Кинилэр толору хааччыллыылаах усулуобуйаҕа олорон абыраннылар.