Саха Өрөспүүбүлүкэтин Ил Дархана Айсен Николаев судаарыстыба уонна бэлиитикэ уһулуччулаах диэйэтэлэ Илья Егорович Винокуров пааматынньыгар сибэкки дьөрбөтүн ууруу сиэригэр-туомугар кытынна.
«Кини аата Саха сирэ тэриллиитин уонна сайдыытын саамай суолталаах кэрчик кэмнэрин, ураты эппиэтинэстээх буолуу уонна бигэ быһаарыылары ылыныы ирдэнэр кэмин кытта быстыбат ситимнээх. Кини өрөспүүбүлүкэ социальнай-экэнэмиичэскэй олоҕун бөҕөргөтүүгэ, инфраструктура сайдыытыгар уонна нэһилиэнньэни өйөөһүҥҥэ сүҥкэн кылаатын киллэрбитэ. Кини олоҕун суола — бэйэни харыстаммакка үлэлээһин, норуокка бэриниилээх буолуу уонна төрөөбүт дойду дылҕатыгар эппиэтинэстээхтик сыһыаннаһыы чаҕылхай холобура буолар. Маннык дьон туһунан сырдык өйдөбүл биһиги өрөспүүбүлүкэбит уонна дойдубутун устуоруйатыгар үйэлэргэ хаалар», — диэн бэлиэтээтэ Айсен Николаев.
Тэрээһиҥҥэ кыттааччылар Илья Винокуров сырдык аатын чиэстээтилэр, кини өрөспүүбүлүкэ сайдыытыгар киллэрбит кылаатын уонна норуот туһатыгар бэриниилээхтик үлэлээбитин тоһоҕолоон эттилэр. Кини аата Саха сирин устуоруйатыгар судаарыстыбаннай дьыалаҕа эппиэтинэстээхтик сыһыаннаһыы үрдүк холобурунан хаалара бэлиэтэннэ.
Үбүлүөйдээх сыл чэрчитинэн маннык өйдөбүнньүк тэрээһиннэри ыытыы көлүөнэлэр ситимнэрин бөҕөргөтүүгэ уонна эрэгийиэн устуоруйатын нэһилиэстибэтин харыстаан хаалларыыга туһаайыллар.
Хаартыскаҕа Саргын Скрябин, ЯСИА түһэриилэрэ