Бүгүн, муус устар 18 күнүгэр, Нам улууһун Нам сэлиэнньэтигэр саҥа балыыһа куорпуһа аһылынна. Олохтоохтору бу кэтэһиилээх үөрүүлээх түгэнинэн эҕэрдэлии өрөспүүбүлүкэ Ил Дархана Айсен Николаев тиийдэ.
Доруобуйа харыстабылын саҥа эбийиэгэ 3700 квадратнай миэтэрэ уопсай иэннээх үс этээстээх таас дьиэ буолар. Балыыһа Арассыыйа Бэрэсидьиэнэ Владимир Путин көҕүлээбит «Уһун уонна көхтөөх олох» национальнай бырайыак чэрчитинэн тутулунна.
«Кэнники сылларга биһиги өрөспүүбүлүкэбитигэр Арассыыйа Федерациятын Бэрэсидьиэнэ Владимир Владимирович Путин өйөбүлүнэн уонна «Биир ньыгыл Арассыыйа» баартыйа национальнай бырайыактарын олоххо киллэрии түмүгүнэн 112 доруобуйа харыстабылын эбийиэгэ үлэҕэ киирдэ. Бу кэм иһигэр Нам улууһугар эрэ алта саҥа биэлсэр-акушер пууна уонна быраас амбулаторията аһылынна. Бу үлэ чыпчаалынан бары аныгы ирдэбилгэ эппиэттиир, толору хааччыллыбыт аныгы балыыһа буолла. Кини саамай инники күөҥҥэ иһэринэн, ол иһигэр киэҥ хабааннаах чинчийиилэри оҥорор аппарааттарынан хааччылынна. Бу нэһилиэнньэҕэ мэдиссиинэ көмөтүн оҥоруу таһымын хаачыстыбалыы үрдэтэргэ кыах биэрэр», – диэн бэлиэтээтэ Айсен Николаев.
Саҥа эбийиэк 50 куойка-миэстэҕэ суоттанар. Тэрилтэ бастакы этээһигэр диагностика сулууспата (рентген, УЗИ, эндоскопия), суһал көмө, акушерство уонна гинекология салаата бааллар. Иккис этээскэ терапия салаата уонна реанимация бааллар. Оттон үһүс этээскэ операционнай блок уонна хирургия салаата миэстэлэрин буллулар.
Хаартыскаҕа Саргын Скрябин, ЯСИА түһэриилэрэ