Бүгүн Өксөкүлээх Өлөксөй аатынан Норуоттар доҕордоһууларын дьиэтигэр дойду үрдүнэн ыытылла турар XI норуоттар икки ардыларынааҕы «Улахан этнографическай дьыктаан» аахсыйа буолла.
Саха сиригэр дьыктааны суруйууга анаан 333 былаһаакка бэлэмнэммит буоллаҕына, бүгүн норуоттары сомоҕолуур дьиэҕэ бэрт үгүс омук дьоно тоҕуоруһа муһуннулар.
Тэрээһиҥҥэ дьиэ кэргэнинэн кэлэн кыттыбыттара болҕомтону тарта.
“Бу улахан тэрээһини Арассыыйа Федерациятын Национальностар дьыалаларыгар федеральнай агентствота (ФАДН) боппуруостары бэлэмнээбитэ. Быйылгы этнографическай дьыктааҥҥа араас национальнай түмсүүлэртэн 80-ча киһи кытынна. Дьон сүрүннээн бэйэлэрин билиилэрин тургутан көрдүлэр”, — диэн санаатын үллэһиннэ Өксөкүлээх Өлөксөй аатынан Норуоттар доҕордоһууларын дьиэтин иһитиннэрэр-аналитическай салаа сүрүннүүр үлэһитэ Эдуард Федотов.
Суолталаах тэрээһиҥҥэ Арассыыйа Дьоруойа Александр Находкин, СӨ Тас сибээскэ уонна норуоттар дьыалаларыгар миниистирэ Гаврил Кириллин, Ил Түмэн Судаарыстыбаннай Мунньах Бэрэссэдээтэлин солбуйааччыта Александр Подголов кыттыыны ыллылар.
«Таджикистан Сойууһа” национальнай култуурунай түмсүү көхтөөх ыччата, АГАТУ 4-с кууруһун устудьуона Шохрух Каримов быйыл иккис сылын бу тэрээһиҥҥэ кыттар эбит.
АГАТУ устудьуона «боппуруостар тест курдук буолан, киһи ыарырҕаппат, толкуйдуурга табыгастаахтар» диир.
Арассыыйа сиригэр-уотугар олорор норуоттар баай култуураларын кытта билиһиннэрэр, олохтоохтор бу норуоттар үгэстэрин уонна сиэрдэрин-туомнарын төһө билэллэрин сыаналыыр сыаллаах-соруктаах бүтүн Арассыыйатааҕы сырдатар аахсыйа бүгүн Норуоттар сомоҕолоһууларын күнүгэр бэрт тэрээһиннээхтик ааста.
Дьыктаан түмүгэ Өксөкүлээх Өлөксөй аатынан Норуоттар доҕордоһууларын дьиэтин үлэтин сырдатар саайтка тахсыаҕа.