Алтынньы 29 күнүгэр Судаарыстыбаннай Дуума пленарнай мунньаҕар 2027 сыллааҕы уонна 2028–2029 сыллардааҕы федеральнай бүддьүөт сокуонун барылын кытта Арассыыйа социальнай пуондатын бүддьүөтүн барылын бастакы ааҕыыга ылыннылар.
Үс сыл устата Социальнай пуонда соруктарын олоххо киллэриигэ 63 триллион солкуобайтан тахса үп-харчы ыытыллара былааннанар. Страховой биэнсийэлэр инфляцияттан үрдүк тэтиминэн индексацияланыахтара, байыаннай дьайыы кыттыылаахтарын чөлүгэр түһэрэр кииннэргэ эмтээһин бырагыраамата кэҥиэҕэ, чөлгө түһэрии тиэхиньикэтин үбүлээһин улаатыаҕа, страховой босуобуйалар муҥутуур кээмэйдэрэ үрдүөҕэ.
Ол курдук, эһиил страховой биэнсийэлэр иккитэ индексацияланыахтара: олунньу 1 күнүттэн 6,8 %, муус устар 1 күнүттэн 3,3 %. Оҕолоох дьиэ кэргэттэри өйүүргэ 2,2 триллион солкуобай ыытыллыаҕа. Арассыыйатааҕы Социальнай пуонда үбүттэн больничнай лиистэри уонна ийэ буолуунан сибээстээх босуобуйалары төлүүргэ 1,6 триллион солкуобай барыаҕа.
Социальнай пуонда бүддьүөтүн барылыгар байыаннай дьайыы кыттыылаахтара — бойобуой дьайыылар бэтэрээннэрэ сонотуоруй-курортнай эмтэниигэ эбэтэр мэдиссиинэ өттүнэн чөлгө түһүүгэ барар уонна төннөр айаннарын үбүлээһин ороскуоттара көрүлүннүлэр. Ону тэҥэ кинилэри арыаллыыр дьон айанын, олорор уонна аһыыр ороскуоттара киирдэ. Бу бастакы группалаах инбэлииттэргэ эбэтэр мэдиссиинискэй көрдөрүүнэн арыалдьыттаах сылдьар наадалаах АБДь кыттыылаахтарыгар сыһыаннаах. 2027 сылга бу сыалларга үбүлээһин биэс миллиард солкуобайга диэри улаатыаҕа.
Социальнай пуонда 2027 сыллааҕы бүддьүөтэ гражданнар иннилэригэр биэнсийэ уонна социальнай эбэһээтэлистибэлэри барытын толору хааччыйар диэн Судаарыстыбаннай Дуума пленарнай мунньаҕар Социальнай пуонда бүддьүөтүн барылын көрүүгэ пуонда баһылыга Сергей Чирков иһитиннэрдэ.
«Биир ньыгыл Арассыыйа» фракция сокуон барылын биир санаанан өйөөтө.