«Дьокуускайдааҕы» ИДьМ сулууспатын 2-с нүөмэрдээх полициятын отделыгар мэдиссиинэ тэрилтэтиттэн эр киһи эчэйиини ылбытын туһунан иһитиннэрии киирбит.
Холуобунай ирдэбил үлэһиттэрэ сокуону кэһиигэ Булуҥ улууһуттан төрүттээх 20 саастаах эдэр киһи сыһыаннааҕын быһаарбыттар.
Дьокуускай биир түүҥҥү тэрилтэтигэр эмсэҕэлээбит киһи уонна уорбаланааччы икки ардыларыгар айдаан тахсыбыт. Салгыы таһырдьа, тэрилтэ аттынааҕы сиргэ өйдөспөт буолууттан, уорбаланааччы эр киһиэхэ эт-хаан эчэйиитин оҥорбут. Эмсэҕэлээбит киһи сыҥааҕа тостубута биллибит.
РФ Холуобунай кодексатын 112-с ыстатыйатын 1-кы чааһынан («Доруобуйаҕа анаан-минээн орто ыарахан эчэйиини оҥоруу») холуобунай дьыала тэрилиннэ. Буруйдаах сокуонунан 3 сылга диэри көҥүлэ быһыллыан сөп.