Бэйэҥ тус бырайыаккын олоххо киллэрэн, төрөөбүт нэһилиэгиҥ, улууһуҥ сайдыытыгар кылааккын киллэриэххин баҕараҕын дуо? Оччоҕуна бу сонун чуолаан эйиэхэ ананар. «Молодёжь и дети» национальнай бырайыак чэрчитинэн «Росмолодежь.Гранты» куонкурус иккис сезонугар сайаапкалары тутуу салҕанар.
Саха сирин көхтөөх ыччата балаҕан ыйын 15 күнүгэр диэри «Молодежь России» ФГАИС платформатыгар сайаапка биэрэн, бэйэтин бырайыагар 1 мөлүйүөн солкуобайга тиийэ грант ылар кыахтаах.
Арассыыйа Бырабыыталыстыбатын вице-премьерэ Дмитрий Чернышенко бэлиэтииринэн, куонкурус эдэрдэргэ бэйэлэрэ сөбүлүүр дьыалаларын булалларыгар көмөлөһөр соруктаах: «Бу грант көмөтүнэн көхтөөх уолаттар уонна кыргыттар бэйэлэрин бырайыактарыгар 1 мөлүйүөҥҥэ диэри харчыны ылан, атыттарга эмиэ сайдалларыгар кыах биэриэхтэрин сөп». Билигин маннык өйөбүлүнэн эрэгийиэннэргэ эдэр учуонайдар оскуолалара, үөрэх бырайыактара, инклюзивнай айар мастарыскыайдар аһыллан үлэлииллэр. Оттон саамай ситиһиилээх бырайыактар бүтүн Арассыыйа таһымыгар тахсаллар.
Саха Өрөспүүбүлүкэтин ыччат дьыалаларыгар уонна социальнай коммуникацияларга миниистирэ Петр Шамаев этиитинэн, куонкурус — Саха сирин эдэр дьонугар бэйэлэрин санааларын олоххо киллэрэргэ сүҥкэн тирэх буолар.
«Ааспыт сылга биһиги ыччаттарбыт олус көхтөөхтүк кыттыбыттара. Кинилэр бырайыактара билигин олоххо киирэн, социальнай инфраструктураны сайыннараллар, дьон мустар, алтыһар сирдэрин тэрийэллэр. Биһиги министиэристибэбит өттүттэн санааны сааһылаан, сайаапканы толорорго диэри ханнык баҕарар түһүмэххэ көмөлөһөргө бэлэммит. Бүгүҥҥү биир үчүгэй санаа — сарсын бүттүүн нэһилиэк эбэтэр улуус сайдыытыгар туһалаах улахан бырайыак буолуон сөп. Онон бу кыаҕы мүччү тутумаҥ», — диэн миниистир ыҥырда.
Кимнээх кыттыахтарын сөбүй?
Куонкуруска 14-тэн 35 саастарыгар диэри (35-ин киллэрэн туран) Арассыыйа уонна Абхазия гражданнара кытталлара көҥүллэнэр. Хас биирдии ааптар 18 тиэмэттэн биирин талан, социальнай бырайыагын көмүскүүр кыахтаах.
Сайаапканы манна биэриэххэ сөп: https://myrosmol.ru/events/a7b69fc8-db63-4ac7-ac63-37631b03e20e
Санаттахха, «Молодёжь и дети» нацбырайыак эдэр дьон талааннарын арыйарга уонна сайдалларыгар усулуобуйа тэрийэргэ туһаайыллар. Арассыыйа Бэрэсидьиэнэ Владимир Путин дьаһалынан саҥардыллыбыт нацбырайыактар 2025 сылтан олоххо киириэхтэрэ.
