Алдан куорат олохтооҕо интэриниэт ситимигэр экстремистскэй дьайыыны оҥорорго анаан-минээн ыҥырыылары таһаарбытын уонна тарҕаппытын иһин сууттанна.
Алдан оройуонун суута Саха сиринээҕи ФСБ управлениетын силиэстийэлиир салаата хомуйбут дакаастабылларыгар олоҕуран, буруйданааччыны куйаар ситимигэр экстремистскэй дьайыыны оҥорорго анаан-минээн ыҥырыылары таһаарбытыгар уонна тарҕаппытыгар буруйдааҕынан билинэн, 1 сыл 3 ый болдьоххо уопсай эрэсиимнээх холуонньаҕа көҥүлүн быһар накаастабылы анаата.
Силиэстийэҕэ быһаарыллыбытынан, 45 саастаах эр киһи telegram-ҥа экстремистскэй ыҥырыылары суруйан тарҕаппыт. Суут уурааҕа сокуоннай күүһүгэр киирэ илик диэн ФСБ управлениетын пресс-сулууспата иһитиннэрэр.