2026 сылга уоппускаҕа барарга саамай барыыстаах сааскы ыйынан муус устар буолуоҕа, кулун тутар арыый итэҕэс, оттон ыам ыйа саамай бүтэһик миэстэҕэ турар диэн SuperJob юридическай практикатын салайааччыта Александр Южалин РИА Новости иһитиннэрбит.
«Биэс күннээх үлэ нэдиэлэтинэн үлэлиир уонна окладын ылар дьоҥҥо уоппускаҕа барарга саамай барыыстаах ыйынан муус устар буолар; кулун тутар арыый мөлтөх. Саамай барыыһа суох ый — ыам ыйа. Ыйга үлэ күнүн ахсаана араас буолан, биир үлэ күнүн сыаната эмиэ араас буолар», — диэтэ Южалин.
Кини этэринэн, муус устарга 22 үлэ күнэ, кулун тутарга — 21, оттон ыам ыйыгар 19 үлэ күнэ баарынан быһаарыллар. Эспиэр быһаарбытынан, уоппуска күнэ бүтэһик сыл орто хамнаһынан төлөнөр, оттон үлэ күнүн сыаната окладтан уонна ыйга баар үлэ күннэрин ахсааныттан тутулуктаах.
«Ханнык ыйга биир үлэ күнүн сыаната орто хамнастааҕар үрдүк буоллаҕына, үлэлиир ордук барыыстаах. Оттон көрдөрүүлэр тэҥ эбэтэр орто хамнас үрдүк буоллаҕына, уоппусканы ылар барыыстаах», — диэн түмүктээтэ Южалин.