Бүгүн 7 көрүҥнээх «Аҕа күрэҕин» кыайыылааҕынан Амма улууһун хамаандата — аҕалаах уол Николай уонна Айсен Алексеевтар буоллулар.
2-с миэстэҕэ — Андрей уонна Максим Пивоваровтар, 3-с миэстэҕэ Чурапчы улууһуттан Сергей уонна Саян Крыловтар буоллулар.
11 улуустан эрбии тииһин курдук киирсибит 13 хамаанда бары көхтөөхтүк кыттан, Саха сирин аҕаларыгар холобур көрдөрдүлэр.
Кыайыылаах Амма хамаандатын аҕа баһылыга Николай Алексеев олус эрийсиилээх күрэхтэһии буолбутун бэлиэтээтэ.
— «Аҕа күрэҕэр» улуустарыгар бастаабыт аҕалаах уол кэлбит буолан, күрэхтэһии олус тыҥааһыннаахтык барда. Биһиги чурапчылары кытта тэҥҥэ испиппит. Хамаандабытын олус күүскэ биир дойдулаахтарбыт чакырдар, халыҥ сис аймахтарбыт өйөөтүлэр. Бар дьоммутугар барҕа махталбытын тиэрдэбит! Бу күрэхтэһиигэ Саҥа дьыл кэнниттэн бэлэмнэнэн барбыппыт. Былырыыҥҥы күрэхтэһиигэ биһиги төрдүс миэстэҕэ тиксибиппит. Маннык күрэхтэһиигэ улахан бэлэмнээх уонна эрчиллиилээх дьон кытталлар. Онон бэйэбитигэр ирдэбил улахан этэ. Ол да иһин бастаатытыбыт«,- диэн кыайыылаах Николай Алексеев санаатын үллэһиннэ.
Амма улууһун Чакыр нэһилиэгин баһылыгын солбуйааччы Иннокентий Тарасов улуус дьаһалтатын аатыттан убаһа сэртипикээтин, нэһилиэк дьаһалтатын аатыттан 50 тыһ. солк., Алексеевтар дьиэ кэргэн аймахтара холбоон 80 тыһ. солк. харчынан бэлэх туттардылар.
Дьэ, онон, доҕоттор, эһиил баччаҕа Амма Чакырыгар көрсөр буоллубут!
Үлэ уонна социальнай сайдыы миниистирин солбуйааччы Иннокентий Коротких кыайыылаахтары эҕэрдэлииригэр «Саха ыалыгар уол оҕону иитиигэ өбүгэ саҕаттан болҕомто ууруллар. Аныгы үйэ ыччатын, чуолаан олоххо толору бэлэмнээх эр дьону иитэн таһаарыыга эһиги курдук «Аҕа күрэҕин» кыттааччыларыгар тэҥнэһэбит» диэн бэлиэтээтэ.
