Кулун тутар 19-21 күннэригэ Өлөөн улууһун Кирбэй нэһилиэгин 85 сылыгар, “Өлөөн” сопхуос 65 сылыгар аналлаах табаһыттар сүлүөттэригэр Сунтаар улууһуттар уопсастыбаннай түмсүүлэртэн мустаммыт, 12 буолан баран ыалдьытаан кэллибит.
Аһара үчүгэй тэрээһин буолла. Ол курдук, Харыйалаах кулуубугар иистэнньэҥнэр, маастардар улахан быыстапката тардыллыбыта көрүөхтэн кэрэ көстүү.
Онтон урут уонна билигин үлэлээн ааспыт, үлэлии сылдьар чуум үлэһиттэрин, табаһыттары ыҥыртаан, ахтыы киэһэтин оҥордулар. Эҕэрдэлэр, ырыа үҥкүү дьиэрэйдэ. Кэлбит ыалдьыттар, салалта эҕэдэлээтилэр. 50 сыл бииргэ олорбут Кирилловтары чиэстээтилэр. 86 саастаах чуум үлэһитэ Анна Нифонтовна сэргэх сылдьарын көрөн астынныбыт.
Куораттан быраастар кэлэннэр биригээдэ дьонун көрдүлэр-иһиттилэр.
Иккис күнүгэр Кирбэй нэһилиэгин үбүлүөйүгэр аналлаах аһыллыыта сарсыарда 12 ч буолла. Түөлбэлэр бары параадтаан киирдилэр.
Бары хотугулуу таҥастаах, табаларын сиэтэн, сыарҕаларыгар бэтэрээннэрин, оҕолору олордон киирдилэр.
Ыстаада оҕолоро табаларын миинэн киирбиттэрэ олус үчүгэй.
Таба сүүрдүүтэ хас да көрүҥүнэн буолбутун ыраахтан кэлбит ыалдьыттар олус сэргээтибит. Чуолаан, таба сүүрдүүтүгэр элбэх бириис олохтоммутун биһирээтибит.
Кэлбит дьоҥҥо, олохтоохторго лотерея оонньоммута дьону өссө сэргэхситтэ. Олохтоох дьон сүүйэн үөрүүлэрэ өссө үксээтэ. Ыалдьытымсах Өлөөн дьонугар махтанабын. Тыйыс усулуобуйаҕа ыарахан үлэлээх табаһыттарга өссө да үлэттэн чаҕыйбакка, таһаарыылаах үлэни, дьолу-соргуну, доруобуйаны баҕарабын.
Антонина Степановна Кириллина, уопсастыбаннай түмсүү кыттыылааҕа.
Сунтаар.