Саха сирин Ил Дархана Айсен Николаев Ростехнадзор Өлүөнэтээҕи управлениетын салайааччытын э.т. Виталий Савченкону кытта көрүстэ. Кинилэр 2026 с. халаан кэмигэр өрөспүүбүлүкэ сиригэр-уотугар гидротэхиньиичэскэй тутууларга куттал суоһаабатын хааччыйыы боппуруостарын дьүүллэстилэр.
Саха сиригэр 300 эбийиэк баарыттан Ростехнадзор кэтээн көрүүтүгэр 120 эбийиэк кирэр. Итилэр аналларын чопчулуур үлэ ыытыллар, куттал суох буолуутун декларацията оҥоһуллар.
Эрдэ биллибит кэһиилэри туоратыыга болҕомто ууруллар. Бэрэбиэркэлэр түмүктэринэн муниципальнай гидротэхиньиичэскэй тутуулары көрүүгэ-истиигэ сыһыаннаах итэҕэстэр туоратыллыбыттар. Ол иһигэр, сири-уоту ыраастааһын, эбийиэктэр сөптөөх тэхиньиичэскэй туруктарын хааччыйыы.
Бу тутуулары көрүүгэ уонна өрөмүөннээһиҥҥэ үбүлээһини дьүүллэстилэр. Бүддьүөт үбэ куттала суох туһаныыны хааччыйыыга, страховкалааһыҥҥа, бырайыак докумуонун оҥорууга наадалаах. Федеральнай кыттыгас үбүлээһини тардар кыахтар көрүллэллэр.
“Халааны аһарыы кэмигэр бэлэмнэнии боппуруостара ураты суолталаахтар. Бу гидротэхиньиичэскэй тутуулар туруктарын мэлдьи хонтуруоллуохтаахпыт. Сүрүн сорук – ночоот тахсыытын аччатыы уонна дьоҥҥо куттал суох буолуутун хааччыйыы”, — диэтэ Айсен Николаев.
sakha.gov.ru
Хаартыска: Андрей Сорокин, ЯСИА
Сиһилии: https://www.sakha.gov.ru/news/40996