Быйыл саас Аммаҕа куобах элбээбит үһү диэн сонун социальнай ситимнэринэн тарҕаммыта. Ол төһө оруннааҕын туһунан Олом Күөлгэ баар “Наахара” бааһынай хаһаайыстыба баһылыга Егор Кузьминтан туоһуластыбыт.
— Кырдьык, куобах саас аайы элбиир. Кэтээн көрдөххө, баччаларга элбиир курдук. Саһыл эмиэ оннук. Кыһын хапкаан көрө сылдьан көрдөхпүнэ, суола аҕыйах этэ. Оттон билигин элбээбит. Бэл, үнүр икки саһыл батысыһа сылдьара. Бөрөлөр тустарынан эттэххэ, былырыын биһиги сирбитигэр-уоппутугар үс баара. 7-8 км сиринэн эргийэн ааһаллара. Быйыл күһүн аҕыс баар этэ. Итинтэн болугурдар иккини, мин биири ылбытым, — диир тыа хаһаайыстыбатынан дьарыктанар бөрөһүт.
Бу адьырҕалар быйыл бу хаһаайыстыба биир убаһатын тардыбыттар. Ол эрээри, төһө да хаар халыҥаатар, от баар буолан, сылгылар туруктара этэҥҥэ эбит. Хаһаайыстыба баһылыга ардай аһыылаахтар буулаабаттарын туһугар сылгыларын кыраҕытык кэтиир.
Хаартыска: Е.Кузьмин