Бүгүн Ил Түмэн пленарнай мунньаҕар «Географическай эбийиэктэр ааттарын туһунан» Федеральнай сокуон 7-9 ыстатыйаларыгар, «Саха Өрөспүүбүлүкэтин сиригэр-уотугар географическай эбийиэктэргэ ааттары иҥэрэр туһунан эбэтэр географическай эбийиэктэр ааттарын уларытар туһунан этиилэри көрүү бэрээдэгин туһунан» көрүлүннэ.
Онно Сунтаар улууһун Сиэйэ сэлиэнньэтин аатын «село Шея» диэни «село Сиэйэ» диэҥҥэ уонна Сиэйэ нэһилиэгин аатын «Шеинский наслег» диэни «Сиэйэнский наслег» диэҥҥэ уларытар туһунан этиллэр.
Бу иннинэ Саха сиригэр сэлиэнньэ уонна нэһилиэк аатын уларытыы туһунан көҕүлээһини Ил Түмэн Судаарыстыбаннай тутууга уонна сокуоҥҥа сис кэмитиэтин мунньаҕар дьокутааттар өйөөбүттэрэ. Норуот дьокутаата Александр Жирков эрэгийиэн административнай-территориальнай единицаларын уларытыы туһунан көҕүлээһинигэр сөп түбэһиннэрэн, уларытыллар. Дьүүллэһиигэ туһааннаах нэһилиэк баһылыга Александр Романов кыттыбыта. Кини этэринэн, Сунтаар улууһун Сиэйэ нэһилиэгин олохтоохторо нууччалыы суруллубут Шея нэһилиэгин аатын уларытар туһунан этиини, бэрэстэбиитэллээх уорган аһаҕас истиилэригэр уонна мунньахтарыгар өйөөбүттэр. Олохтоохтор үксүлэрэ бу көҕүлээһини кытта сөбүлэһэллэрин биллэрбиттэр.
Норуот дьокутааттара бу боппуруоһу өйөөтүлэр. Онон Сиэйэ сэлиэнньэтин уонна Сиэйэ нэһилиэгин аатын уларытыыны быһаарар матырыйааллар уонна докумуоннар сыныктааһыны ыытыыга анаан Судаарыстыбаннай регистрация, кадастр уонна картография федеральнай сулууспатыгар ыытыллыаҕа. Бары процедуралар түмүктэннэхтэринэ саҥа ааттар реестрга официальнайдык киллэриллиэхтэрэ.
Дьүүллэһии түмүгүнэн Ил Түмэн Судаарыстыбанай тутууга уонна сокуоҥҥа сис кэмитиэтин уурааҕынан бырайыак биир санаанан бигэргэммит.