Арктикатааҕы ускуустуба, култуура уонна креативнай индустрия университета Инновационнай менеджмент үрдүкү оскуолатын кытта былырыын ситимнээх бырагырааманан “Креативнай индустрияны салайар маастар” диэн үөрэх бырагырааматын оҥорбуттар. Былырыын үөрэммиттэр номнуо бырайыактарын олоххо киллэрэн дохуоттана сылдьалларын туһунан бүгүҥҥү пресс-кэмпириэнсийэҕэ билиһиннэрдилэр.
Арктикатааҕы ускуустуба, култуура уонна креативнай индустрия университета ахсынньыга университет үрдүк аатын ылбыта, ол иннинэ институт этэ. Университет үөрэххэ, цифровизацияҕа проректора Зоя Стрекаловская иһитиннэрбитинэн, былырыын Инновационнай менеджмент үрдүкү оскуолатын кытта “Креативнай индустрияны салайар маастар” үөрэх бырагырааматын оҥорбуттар.
— Манна өрөспүүбүлүкэ араас улуустарыттан 60-тан тахса киһи үөрэммитэ. Кыттааччылартан олус үчүгэй сорудахтары быһаарыылары (кейсы) туппуппут. Бу өрөспүүбүлүкэ креативнай экэниэмикэтин сайыннарар бэлэм бырайыактар буолаллара биһигини олус үөрдэр. Бу муус устар 6 күнүттэн үөрэхпитин саҕалыыбыт. Истээччилэр суруйтара тураллар.
Тэйиччиттэн (дистанционно) уонна олоҕурбут көрүҥүнэн (очно) үөрэх 6 модультан турар. Быйыл бырагыраама мэтиэдикэтин уларытан биэрдибит, өрөспүүбүлүкэ култуураҕа диэйэтэллэрин, креатордары кытта көрсүһүү, экскурсия, стажировка быһыытынан саҥа көрүҥү киллэрдибит. Лектордар бары үрдүк кылаастаах, Саха сирин уонна дойду таһымнаах бэрэпиэссэрдэр буолаллар” – диэн этэр. Үөрэх урбаанньыттарга, култуура үлэһиттэригэр уонна креативнай экэниэмикэни кытта билсиэн баҕалаах дьоҥҥо барыларыгар анаан ыытыллар.
Инновационнай менеджмент үрдүкү оскуолатын сайыннарыыга дириэктэрэ Иннокентий Ксенофонтов:
— Үөрэх “Приоритет-2030” федеральнай бырагыраама иитинэн, Арктикатааҕы ускуустуба, култуура уонна креативнай индустрия университета көҕүлээһининэн былырыыҥҥыттан олоххо киирбитэ. Ил Дархан иһинэн үлэлиир Инновационнай менеджмент үрдүкү оскуолата тустаах үөрэх операторынан буолар. Култуура, ускуустуба, онтон да атын, ол иһигэр биисинэс эйгэтигэр үлэлээччилэри хабан, креативнай индустрияны сатабыллаахтык (профессионал) салайар дьону бэлэмниир бырагырааманан буолар. Былырыын мэдэссиинэ, биисинэс, култуура үлэһиттэрэ о.д.а. кэлэн үөрэммиттэрэ. Быйыл 70 киһини үөрэтэр былааннаахпыт, — диэн эттэ.
Былырыын үөрэммит дьон номнуо бырайыактарын олоххо киллэрбиттэр. Кинилэртэн сорохторо пресс-кэмпириэнсиэйэҕэ кэлэн бырайыактарын кэпсээтилэр. Ол курдук, СӨ судаарыстыбаннай цииркэтин оркестрын салайааччыта, Арассыыйа, норуоттар икки ардыларынааҕы джаз бэстибээллэрин продюсера, тэрийээччитэ (ол иһигэр быйыл Дьокуускайга ыытыллыбыт “ТОҤ-ДЖАЗ”) Егор Ефимов былырыын үөрэх буоларын туһунан истэн кэлбит, олус элбэҕи иҥэринним, туһанным диэн этэр.
Былырыын үөрэҕи ааспыттар кэккэлэригэр араас эйгэттэн бааллара диэн этэллэр. Онтон Айыына Тихонова быраас идэлээх киһи. Креативнай индустрияҕа үөрэх кэнниттэн, эрдэттэн иитиэхтии сылдьыбыт икки бырайыагыттан биирдэһин — “Тумус” оҕо оонньуурун олоххо киллэрэн номнуо атыыга таһаарбыт. Билиҥҥи курдук оҕолорбут ийэ тылларын умнан эрэр кэмнэригэр бу олус туһалаах буолсу.
Диана Васильева Владивостокка олорор буолан маҥнай онлайн үөрэнэн саҕалаабыт, онтон очно салҕаабыт уонна сүүнэ бырайыакка ылсыбыттар – Дьокуускайга баар гектардарыгар “Тыын” эко-паарканы тутарга быһаарыммыттар. Манна спа-киин, панорамнай көстүүлээх эрэстэрээн, доруобуйа паарката, сатыы хаамыы, сиэр-туом толоруута, олохтоох оҥорон таһаарыы лабаратыарыйата баар буолуохтара диэн этэр. Владивостокка “Улица Дальнего Востока” баарын курдук, бу эко дьоҕус түөлбэҕэ Дьокуускайга туристары умсугутар “Улицы улусов РС(Я)” диэни оҥоруохтарын баҕараллар. Ити курдук, аҕыйах ый анараа өттүгэр үөрэммиттэр номнуо бырайыактарын олоххо киллэрэн, үлэлээн эрэллэр.
Онон креативнай индустриянан креативнай экэниэмикэни сайыннарыан баҕалаахтары муус устар 6 күнүттэн саҕаланар үөрэххэ ыҥыраллар. Сайаапканы муус устар 3 күнүгэр диэри ылаллар. Сиһилии 84112508654 (Инновационнай менеджмент үрдүкү оскуолата), 89245909020 (Арктикатааҕы ускуустуба, култуура уонна креативнай инудстрия судаарыстыбаннай университета) ыйыталаһыаххытын сөп.
