Бүгүн, кулун тутар 29 күнүттэн, Дьокуускайга Үөһээ Бүлүү улууһун үөрэҕириитин ситимэ төрүттэммитэ 150 сылыгар аналлаах үөрүүлээх тэрээһиннэр саҕаланнылар.
Быйылгы сыл улууска Үөрэҕирии сылынан биллэриллибитэ. Онон Үөһээ Бүлүү күннэрэ сүрүннээн үөрэҕирии сайдыытын чэрчитинэн ыытыллар.
— Үөһээ Бүлүү улууһугар Исидор Барахов аатынан орто оскуола тэриллибитэ быйыл 150 сыла. Ол онтон сиэттэрэн быйыл улууспутугар биллэриллибит Үөрэҕирии сылыгар туһуламмыт үс күннээх Үөһээ Бүлүү үбүлүөйдээх сылга анаан тэриллибит улахан тэрээһиҥҥэ оскуола дириэктэрдэрэ, уһуйаан сэбиэдиссэйдэрэ, эбии үөрэхтээһин тэрилтэлэрин салайааччылара, уопсайа 100-тэн тахса киһи кыттыыны ыла кэллибит. Үөһээ Бүлүү улууһун дьоро күннэрин чэрчилэринэн улуус үөрэҕин тэрилтэлэрэ уонна Дьокуускай куорат оскуолалара, уһуйааннара бииргэ үлэлэһиигэ сөбүлэҥнэри түһэристибит. Бу суолталаах үлэ үөрэх, билим, култуура эйгэтин сайыннарыыга, уопут атастаһыытыгар, каадырдары өйөөһүҥҥэ туһуланыаҕа, — диэн санаатын үллэһиннэ Николай Бойлохов аатынан Үөһээ Бүлүүтээҕи Оҕо ускуустуба оскуолатын дириэктэрэ Анатолий Иванов.
«Арчы» дьиэтигэр Үөһээ Бүлүү улууһун үөрэҕириитин ситимин 150 сылыгар аналлаах үөрүүлээх тэрээһиннэр чэрчилэринэн оһуохай буолла. Тэрээһиҥҥэ Дьокуускайга олорор биир дойдулаахтар түмсэн, алгыс ылан, оһуохайдаан, үбүлүөйдээх күннэри үөрүүлээхтик арыйдылар. Оһуохайга Үөһээ Бүлүү улууһун оскуолаларын оҕолоро көхтөөх кыттыыны ыллылар.
Маны сэргэ тэрээһин кэмигэр норуот маастардарын оҥоһуктарын быыстапката дьон болҕомтотун тарта.
Бүгүҥҥү «Арчы» дьиэтигэр буолбут тэрээһиҥҥэ Үөһээ Бүлүүттэн төрүттээх биир дойдулаахтара улуус салалтатын, анал дэлэгээссийэҕэ киирсэн кэлбит ахтар-саныыр дьоннорун көрсөн, ирэ-хоро кэпсэттилэр.
Кулун тутар 30-31 күннэригэр Үөһээ Бүлүү күннэрэ салгыы далааһыннаахтык ыытыллыахтара.