Бу күннэргэ Ньургустаана Даниловна Бугулова салайааччылаах Үөһээ Бүлүү улууһун Н.И. Бойлохов аатынан оҕо искусствотын оскуолатын иһинэн оҕолор хордарын кэлэктиибэ Кытай Пекин куоратыгар тиийэн, сөҕүмэр ситиһиилэммитин туһунан үөрүүлээх сонун Сахабыт сирин тилийэ көттө!
Кэлэктиип икки ырыаны толорбутуттан Николай Попов тылларыгар, Анастасия Варламова дьүрүлүгэр «Амсат эрэ дьэдьэҥҥиттэн» диэн ырыалара Гран-при үрдүк аатын сүкпүт. Онон салайааччылара Ньургустаана Бугулова, үөрэтэр оҕолоро, төрөппүттэр үөрүүгэ, киэн туттууга, махталга куустаран сылдьаллар.
Онно билигин сибээс отой быстар мөлтөҕүнэн, оҕолору иилээн-саҕалаан илдьэ барсыбыт төрөппүттэртэн биирдэстэрэ, Үөһээ Бүлүү улууһун дьаһалтатын экэниэмикэҕэ управлениетын сүрүн исписэлииһэ Сардаана Тартакынова маннык кэпсээтэ:
— Биһиги уопсайа 28, ол иһигэр 7 төрөппүт уонна 20 оҕо буолан Ньургустаана Даниловна Бугулова салайааччылаах сырыттыбыт. Улахан түһүлгэҕэ тахсар күммүтүгэр диэри Кытай курдук улуу дойду араас аралдьытар пааркаларыгар, ытык-кэрэ сирдэригэр сылдьан астына-дуоһуйа күүлэйдээтибит, сынньанныбыт, хаартыскаҕа түстүбүт.
Куонкуруспут буолар күнүгэр бастакы блокка киирбиппит. Онно хордар, фольклор ансаамбыллара бааллар. Биһиги оҕолорбут хордаатылар. Кыра саалаларынан, 4 блокка арахсан күрэхтэһэр нүөмэрдэрбитин көрдөрбүппүт.
Саха сирин араас улуустарыттан Ньурба, Сунтаар, Уус Алдан, Таатта, Үөһээ Дьааҥы, Өлүөхүмэ, Чурапчы кэлэктииптэрэ эмиэ кытыннылар. Монголияттан бүтүн биир дэлэгээссийэ кэлбит этэ. Арассыыйа атын куораттарыттан: Москваттан, Амур уобалаһыттан, Тындаттан о.д. а. оҕолор салайааччыларын, төрөппүттэрин кытта бааллара.
Куонкурус буолар күнүгэр күнү быһа улахан Кытай тыйаатырыгар Бэйдайхэҕа, Циньхуандаоҕа сылдьыбыппыт. Тэрээһин барыта улахан тыйаатырга буолбута. Наҕараадалааһын буоларын өр кэтэспиппит. Аны куонкурус нүөмэрдэрин хронометражтарын сөпкө ыйбаккалар икки чаас курдук хойутаабыппыт. Оҕолор тулуурдаахтык, наһаа долгуйа түмүгү кэтэспиттэрэ. Бастаан үһүс истиэпэннээх лауреаттары биллэрбиттэрэ. Онно суох этибит. Онтон иккистэри эппиттэригэр эмиэ ааппыт ааттамматаҕа. Ол кэнниттэн бастакы истиэпэннээх лауреттары биллэрбиттэрэ. Хор Лира диэбиттэригэр оҕолор бары сыанаҕа сүүрэн тахсыбыттара. Наһаа үөрбүттэрэ! Ол икки ардыгар: «Гран-при — хор Лира!» — диэн хаһыытаабыттара соһуччу этэ.
Бэҕэһээ, бүтэһик күммүтүгэр, күнү быһа Аан дойдуга биллибит «Universal Studio Пекина» диэҥҥэ аттракционнардарга сылдьыбыппыт. Хас мультик, киинэ аайы тус-туһунан улахан территориялардаах. Сүрүннээн «Кунг-Фу Панда», «Гарри Поттер», «Миньоны», «Парк Юрского периода», «Трансформеры» мультиктар уонна киинэлэр дьоруойдара бааллара. Оҕолор хас биирдии аттракциоҥҥа барытыгар сылдьыбыттара. Саамай улахан «Трансформеры» диэн территорияҕа улахан да улахан хатааһылыыр горка баар. Гарри Поттеры бэйэтин, Хогвартс замогын көрдүбүт. Оҕолор үтүөкэн өйдөбүлү иҥэриннилэр. Хаһан да маннык пааркаҕа сылдьыбатах буоланнар наһаа астыммыттар.
«Universal Studio Пекина» диэҥҥэ параад буолар эбит. Онно арааһынай мультиктар, киинэлэр дьоруойдара парааттыылларын көрбүппүт. Уопсайынан, наһаа үчүгэй. Улахан хабааннаах параады сэргээтибит. Үҥкүүһүттэр ол сылдьан оҕолору кытта илии тутуһаллар, дорооболоһоллор. Дьоруойдар хаама, сүүрэ сылдьан үҥкүүлээн көрдөрөллөр. Бүгүн Пекинтэн Харбиҥҥа, онтон Хэйхэҕэ бараары, айан түбүгэр сылдьабыт.
Дьэ, бу курдук оҕолорбут сүҥкэн ситиһиилэриттэн чугас дьонноро, аймахтара, доҕотторо, биир дойдулаахтара, Саха сирин бары олохтоохторо долгуйа үөрэн, инникитин да ситиһиилэр сиэттиһэн кэлэ туралларыгар ис сүрэхпититтэн баҕарабыт, алгыыбыт. Айаҥҥыт этэҥҥэ, дьоллоох буоллун!
Галина Васильева
