Нам улууһун II Хомустаах нэһилиэгэр муус устар 11 күнүгэр дьахталларга мас тардыһыытыгар сыл аайы ыытыллар өрөспүүбүлүкэтээҕи турнир буолуоҕа. Күрэхтэһии алта ыйааһын категориятыгар барыаҕа диэн Саха сиринээҕи Мас тардыһыытын федерацията иһитиннэрэр.
«Дьахталларга өрөспүүбүлүкэтээҕи турниры сыл аайы кулун тутарга ыытабыт. Бу күрэх үгэс быһыытынан Аан дойдутааҕы дьахталлар күннэригэр ананар. Быйыл тэрээһиннэр олус элбэх буолан, күрэхтэһии болдьоҕун муус устарга көһөрдүбүт», — диэн Саха сиринээҕи Мас тардыһыытын федерацията бэлиэтиир.
Дьахталлар 50, 55, 60, 65, 75 киилэҕэ диэри уонна 75 киилэттэн үөһээ ыйааһыҥҥа күрэхтэһиэхтэрэ. Кыттааччыларга 2 киилэҕэ диэри эбии ыйааһын көҥүллэнэр.
Мандаат хамыыһыйата муус устар 11 күнүгэр сарсыарда 09:00 чаастан үлэлиэҕэ, оттон турнир 10:30 чааска саҕаланыаҕа. Кыайыылаахтар уонна призердар тэрийээччилэртэн, спонсордартан сыаналаах бириистэринэн наҕараадаланыахтара.
Санатан эттэххэ, ааспыт сыллааҕы турнирга Анастасия Алексеева (50 кг), Татьяна Томская (55 кг), Ирина Севрюк (65 кг), Марина Федоренко (75 кг), Саина Седалищева (85 кг) уонна Татьяна Баишева (85+ кг) кыайыылаах аатын ылбыттара.