Адьырҕа кыыллар Саха сиригэр тыа хаһаайыстыбатыгар хоромньуну таһаараллар, дьон-сэргэ олоҕор даҕаны кутталы үөскэтэллэр. Онон бу кыыллар ахсааннарын сүрүннээһин куруук болҕомтоҕо тутуллар.
“Биология ресурсаларын, айылҕа ураты харыстанар сирдэрин уонна айылҕа пааркаларын дириэксийэтэ” СӨ ГБТ Биология ресурсаларын кадастрын уонна кэтээн көрүүгэ управлениетын кылаабынай исписэлииһэ Левин Николай Геннадьевич маннык иһитиннэрдэ:
— Быйылгы бөрө булдун сезонун кулун тутар бүтүүтэ этэҥҥэ түмүктээтибит. Биһиги департамеммыт дириэксийэтэ нэдиэлэ аайы түмэн таһаарар чахчытынан, өрөспүүбүлүкэ үрдүнэн уопсайа сезон устата 236 бөрө бултанна. Ол иһигэр 79-һу бу кыыл ахсаанын сүрүннээһин түмүгүнэн, ону тэҥэ айылҕа ураты харыстанар сирдэригэр 7-ни. Тэрийбит 16 анал биригээдэбит бөрөһүттэрэ бу адьырҕаны сонордооһуну 2025 сыл ахсынньы бүтүүтэ түмүктээбиттэрэ. Кинилэр уопсайа 64 адьырҕаны сууһарбыттара.
Муус устар саҕаланыыта өрөспүүбүлүкэҕэ үгэскэ кубулуйбут “Булчут күнэ” буолан ааста. Онно сылын ахсын ыытыллар бөрөһүттэр сэминээрдэрин уонна “Бастыҥ бөрөһүт-булчут” куонкуруспутун тэрээһиннээхтик ыыттыбыт. Бу тэрээһиҥҥэ тоҥору-хатары билбэккэ, ыраах сирдэринэн тэлэһийэр үчүгэй көрдөрүүлээх булчуттарбытын наҕараадалаатыбыт. Сыл бастыҥ эсэһитин аатын Бүлүү улууһуттан 9 тыатааҕыны бултаабыт Василий Васильев ылла. Бөрөһүттэр ортолоругар саамай элбэҕи бултаабыт Алдан олохтооҕо Юрий Рубцов кыайыылаах буолла. Иккискэ – Николай Леонтьев (Горнай), үһүскэ – Антон Кардашевскай (Горнай) таҕыстылар. Онон кыайыылаахтар бары анал бириистэри туттулар.
Быйыл өрөспүүбүлүкэҕэ бөрө тириитин тутуутугар үп-харчы көрүллэн, “Центр заготовки пушнины” тириини тутан саҕалаата.