Дойду үрдүнэн игирэ оҕолоох, элбэх оҕолоох төрөппүттэргэ уонна тыа сирин үлэһиттэригэр страховой биэнсийэни анааһыҥҥа үлэ ыстааһын ааҕар быраабыла уларыйда. Бу туһунан муус устар 14 күнүгэр «РИА Новости» ааҕыныстыбаҕа Бырабыытылыстыба тустаах докумуоннарыгар олоҕуран иһитиннэрдэ.
Уларыйыылар оҕону биир аҥаар сааһыгар диэри көрүүгэ бэриллэр уоппуска кэмин ааҕыыга сыһыаннаахтар. Бу кэм страховой биэнсийэни олохтооһуҥҥа үлэ кэмин кытта тэҥҥэ учуоттанар. Урут маннык «дэкириэт» ыстааһа уопсайа 6 сылтан ордуо суохтаах эбит буоллаҕына, аны оҕону биир аҥаар сааһыгар диэри көрбүт кэми барытын ааҕыахтара. Бу биэс уонна онтон элбэх оҕолоох төрөппүттэргэ ордук үрдүк биэнсийэни ылалларыгар кыах биэриэ.
Маны таһынан, тыа хаһаайыстыбатыгар үлэ ыстааһын ааҕыы быраабылатын чопчулаатылар. Бу быраабыла тыа сиригэр олорор, тыа хаһаайыстыбатыгар 30 сылтан итэҕэһэ суох үлэлээбит (билигин үлэлээбэт) биэнсийэлээхтэргэ, саастарынан эбэтэр инбэлииттэринэн страховой биэнсийэлэригэр эбии төлөбүрү ылалларыгар быраап биэрэр. Аны мантан салгыы «тыа сиринээҕи» ыстааска эмиэ оҕону биир аҥаар сааһыгар диэри көрбүт кэм барыта киириэҕэ.
Игирэ оҕолоох төрөппүттэргэ страховой ыстааһы ааҕыы бэрээдэгэр эмиэ уларыйыы киирдэ — аны игирэлэр хас биирдиилэрин көрбүт уоппуска кэмэ туспа учуоттанар буолла.
Ону тэҥэ «Парламентская газета» суруйбутун курдук, муус устар саҥатыгар Судаарыстыбаннай Дуумаҕа суһал көмө салааларыгар үлэлиир мэдиссиинэ үлэһиттэргэ саастарынан страховой биэнсийэни болдьоҕун иннинэ аныырга быраабы биэрэр сокуон барылын киллэрдилэр. Ааптардар этиилэринэн, ити доруобуйа харыстабылын үлэһиттэриттэн ордук улахан социальнай суолталаах салаа дьонугар эбии социальнай өйөбүлэн буолуохтаах.