Бүгүн, муус устар 22 күнүгэр, Кадетскай оскуола уораҕайыгар бу оскуола выпускнига, күрэсчит, байыаннай дьайыыга олоҕун толук уурбут эдэркээн Егор Татаринов сырдык кэриэһигэр оҕолорго өрөспүүбүлүкэтээҕи бокса күрэхтэһиитэ саҕаланна.
Уопсайа 100-тэн тахса кыттааччы кэлбит. Маны сэргэ, Саха сиригэр Олимпийскай оонньуулар боксаҕа чөмпүйүөнэ Альберт Батыргазиев бочуоттаах ыалдьытынан буолла. Кини оҕолорго маастар-кылаас уонна автограф-сиэссийэ ыытта.
Тээрэһин аһыллыытыгар СӨ ыччатын уонна социальнай коммуникацияҕа миниистирэ Петр Шамаев махтал суруктары уонна СӨ ыччатын бэлиитикэтин туйгуна бэлиэни Дьокуускай куорат оҕо успуордун (ДЮСШ) 1-кы №-дээх оскуолатын тириэньэригэр Аркадий Семенович Слепцовка туттарда.
Тэрээһиҥҥэ сэрии толоонугар хорсуннук олоҕун толук уурбут Егор Татаринов ийэтэ, аймахтара кэлбиттэр. Ол курдук ийэтэ Ил Иитэ Бэлиэчэй кыыһа санаатын үллэһиннэ:
-Биһиги Горнай улууһун Күөрэлээх нэһилиэгиттэн сылдьабыт. Уолум Татаринов Егор Евгеньевич 1994 сыллаахха төрөөбүтэ, 2012 сыллаахха манна оскуолаҕа киирэн боксанан дьарыктанан саҕалаабыта. Киирээт ситиһиилэнэн, сыл аайы бокса араас күрэхтэһиилэригэр кыттара. Оҕом оскуоланы бүтэрээт аармыйаҕа барбыта, Хабаровскайга сулууспалыы сылдьан 2017 сыллаахха хантараак түһэрсэн байыаннай дьайыы саҕаламмытыгар биир бастакынан кытта барбыта. Оҕом сырдык кэриэһигэр күрэхтэһии тэриллибиттэн наһаа долгуйдум, оҕом аата үйэтитиллибитинэн махталбын тиэрдэбин. Оҕолору көрөн үөрдүм, бэйэм оҕобун санаан ыллым. Тэрээһиммит этэҥҥэ аастын, оҕолор ситиһиилэнэн этэҥҥэ күрэхтэстиннэр, ким кыахтаах, күүстээх, түргэн кыайдын диэн алгыспын этэбин.
Тэрээһин арыллыытыгар СӨ ыччат уонна социальнай коммуникация миниистирэ Петр Шамаев санаатын үллэһиннэ:
— Егор Татаринов аатын сүгэр боксаҕа күрэхтэһиибит номнуо хаһыс да сылын ыытыллар күрэхтэһии буолар. Егор Татаринов бу оскуоланы бүтэрэн, аармыйаҕа ытык иэһин төлөөн баран, олоҕун байыаннай дьайыы хонуутугар толук уурбута. Кини оскуола сааһыттан боксанан дьарыктаммыта. Былырыын бу күрэхтэһиигэ сүүстэн тахса оҕо кыттыбыта. Быйыл эмиэ элбэх оҕо кытта кэллэ. Күүстээх, хаачыстыбалаах киирсиини көрдөрүөхтэрэ диэн эрэнэбин.
Кыттааччылар санаалара
Сайдам Кривошапкин, Потипа Кирилл, Кадетскай оскуола 7-c «а» кылааһын үөрэнээччилэрэ:
— Биһи боксанан хаһыс да сылбытын дьарыктанабыт. Өрөспүүбүлүкэ араас муннугуттан элбэх оҕо күрэхтэһэ кэлбит. Ким күүстээх, бэлэмнээх кыайыа дии саныыбыт.