Сандал сааспыт сандааран кэлэн, сылыйан, кыһыҥҥы пуховиктар ыскаапка ууруллар кэмнэрэ. Кыһыны быһа киртийбит пуховигы хайдах ыраастыахха сөбүй?
Бастаан сон ордук киртийбит сирдэрин (саҕатын, сиэҕин, сиэптэрин) сөрүүн ууга хаһаайыстыбаннай мыыланан, суокканан сууйабыт. Онтон улахан тааска анал гель (“Гель для стирки пуховых изделий и мембранных тканей”) кутан, сөрүүн ууга сууйабыт. Түүлээх капюшона туспа ылан, ыраастанар.
Дьэ, онтон сону сиэҕин тиэрэн баран, массыынаҕа 30 кыраадыстаах сөрүүн ууга чаас аҥаара сууйтарабыт. Манна эмиэ кыратык гель кутабыт. Анал гель суох буоллаҕына, атын ханнык баҕарар таҥас сууйар гель буолуон сөп. Бороһуогу туттуллубат, тоҕо диэтэр, саһархай суоллары хаалларар. Сууйтарарга теннис мээчигин, эбэтэр, анал мээчиктэри угабыт, оччоҕо түүтэ биир сиргэ мустубат.
Ыктарар эрэсиими наһаа күүстээххэ туруоруллубат, 500‑тээх эрийтэрии сөп. Ыган таһаарбытын кэннэ, ыйаабакка, тэниччи сытыаран куурдуллар. Аллараттан, үөһэттэн салгыннааҕа ордук, эргитэ сылдьан, 1 суукка устата куурдабыт. Сорохтор таһырдьа, салгыннаах сиргэ куурдаллар, оччоҕо түүтэ сахсайар. Саамай кистэлэҥэ диэн, таҥас ыйыыр “плечигинэн” охсуолаан, түүтүн көбүтүөххэ наада. Сууйуллан баран, чап-чараас буолан хаалар, сороҕор, түүтэ аллараа баран хаалыан сөп.
Бастаан кууран истэҕинэ, 5 мүнүүтэ устата туох баар саҕатын, капюшонун, сиэҕин барытын, биир да сири хаалларбакка, төттөрү-таары охсуолуубут. Үчүгэйдик куурбутун кэннэ, өссө уонча мүнүүтэ охсуолаан, көбүтэбит. Оччоҕо түүтэ сахсайан кэлэр, пуховик сылаас буолар. Алдьаммыт буоллаҕына, абырахтаан, тимэхтээн баран, бэйэтин үчүгэйдик суулуубут.
Бу кэннэ чараас таҥаска суулаан, хоруопкаҕа уган, ыскаапка харайабыт. Күһүн хостоон баран, эмиэ охсуолаан, көбүтэбит уонна туруору паардаах өтүүгүнэн паардаан кэбиһэбит.