Мэҥэ Хаҥалас улууһун Аллараа Бэстээх бөһүөлэгэр таһаҕас массыыната түҥнэри көппүтүн түмүгэр 2020 с.т. оҕо өлбүт. Алдьархай быһылаан күнүс 13:10 чааска Гаврилов уулуссатын 5-с №-дээх дьиэтин аттыгар тахсыбыт, диэн Саха сиринээҕи ГАИ управлениета иһитиннэрэр.
Барыллаан дааннайынан, Nissan Diesel массыынаны ыытан испит 1989 с.т. суоппар бэлисипиэттээх оҕону түҥнэри көппүт. Ыарахан эчэйииттэн оҕо суһал көмө биригээдэтэ кэлиэн иннинэ быһылаан буолбут сиригэр тыына быстыбыт. Билигин силиэстийэлиир-оперативнай бөлөх үлэлиир. Полиция быһылаан төрүөтүн быһаарар, бэрэбиэркэ барар.
Саха сирин ГАИ сулууспаа өлбүт оҕо аймахтарыгар уонна чугас дьонугар дириҥ кутурҕанын тириэрдэр. Биэдэмистибэ суоппардары олорор дьиэлэр аттыларыгар уонна тиэргэннэргэ айанныыр кэмнэригэр ордук сэрэхтээх буолалларыгар ыҥырар. Төрөппүттэргэ, оҕолорго күн аайы суолга сэрэхтээх буолуу быраабылаларын санаталларыгар уонна оҕолорун иллэҥ кэмнэрин хонтуруоллуулларыгар сүбэлииллэр.